«Շողեր միություն» ՀԿ նախագահ Հասմիկ Ասլանյանը պնդում է, որ Լոռու մարզի Աթան, Լորուտ եւ Դսեղ համայնքների հարակից տարածքներում մեծ ծավալի հասնող անտառահատումները կազմակերպված խմբի կողմից են իրականացվել: «Բնակիչները չէին կարող այդքան մեծ ծավալի անտառ հատել, սա թերեւս կազմակերպված ցանց է, եւ հնարավոր չէ, որ անտառային տեսչությունը այդ մասին չիմանա»,-Aravot.am-ի հետ զրույցում ասում է ՀԿ-ի նախագահը:
Թեեւ Դսեղի անտառտնտեսության տնօրենը վստահեցրել է Ասլանյանին, որ ծառահատումները օրինական բնույթ են կրում` պլանային են, այնուամենայնիվ, ՀԿ նախագահը տարակուսում է. «Կարծում եմ, որ այդ ծավալի անտառ իրավունք չունեին հատել, շատ մեծ թեքությամբ են հատել` 30-35 աստիճանից բարձր, ինչը հետագայում հղի է սողանքների առաջացման վտանգով»:
Իրավիճակը վերահսկելու եւ ծառահատման օրինականությունը ստուգելու համար կազմակերպությունը, անսալով բնակիչների բողոքներին, իր հերթին ահազանգ է ուղարկել բոլոր պատկան մարմիններին` ՀՀ բնապահպանության նախարարություն, անտառային տեսչություն, անտառային պետական մոնիտորինգի կենտրոն, ԶԼՄ-ների ու քաղաքացիական հասարակության անդամների: «Ամեն դեպքում բոլոր մարմիններն էլ պետք է քայլեր ձեռնարկեն, նաեւ անկախ մարմինները: Եթե անգամ պլանով են հատել, ապա պիտի վերահսկողություն իրականացվի` պարզելու` իսկապես այդպես է թե ոչ: Շատ հնարավոր է, որ պլանով նախատեսվածից ավելին են հատում, ով է ստուգում դա: Մենք այդքան անտառ չունենք, որ այս ձեւով հատենք»,-ասում է Հ.Ասլանյանը:
Անուշ ԲՈՒԼՂԱԴԱՐՅԱՆ
Կարդացեք նաև
