Հանրամատչելի դիզայնի ներմուծումը կայքում` այն մատչելի և հարմարավետ է դարձնում օգտատերերի համար: Նոյեմբերի 1-ին «Հանրամատչելի կայք ստեղծելու գաղտնիքները» հանդիպում-քննարկման ժամանակ User experience UX, User Interface UI դիզայներներ, խորհրդատուներ Վադզ (Vadz) Ղազարյանը, Իշխան Ադամյանն ու Գոռ Վարդանյանը ներկայացրեցին՝ ինչպե՞ս կառուցել նմանօրինակ կայքեր:
Նրանք իրենց փորձը ներկայացրեցին հանդիպման մասնակիցներին, կայքերի կառուցման մատչելի եղանակների, ձևերի մասին մասին խոսեցին, վերլուծեցին հայկական եւ միջազգային լրատվական կայքերի դիզայնը:
Հանդիպման նպատակն էր՝ նպաստել հայկական լրատվական կայքերի դիզայնի բարելավմանը:
Հանդիպման ժամանակ արված իմ գրառումներին կարող եք ծանոթանալ ստորև, կարծում եմ` այդ խորհուրդները ձեզ նույնպես կհետաքրքրեն.
Կարևոր է, որ կայքի ստեղծման հեղինակն օգտատերի հետ հանդիպումներ անցկացնի, զրուցի նրանց հետ՝ իմանալու, թե ինչ խնդիրներ է տեսնում user-ը, ճշտի, թե ինչն է անհասկանալի կամ հասկանալի կայքում: Կարող է խնդրել օգտատերին գրանցվել կայքում ու ուշադիր լինել, թե որտեղ է օգտատերը փնտրում «մուտք»-ի կոճակը: Նմանօրինակ փորձարկումները հնարավորություն կտան հասկանալու՝ ինչպես կառուցել կայքը, որպեսզի այն հարմարավետ լինի օգտատերի համար:
Կայքերում մեծ նշանակություն ունի նաև գրվածքի տառատեսակը: Պարզվում է, որ մարդիկ չեն կարդում կայքում: Հետազոտությունները ցույց են տվել, որ մարդիկ տեքստը «scan»են անում՝ գտնելու իրենց համար ամենահետաքրքիրը կայքում:
Նույն նյութը հնարավոր է գտնել տարբեր կայքերում, բայց քո ընտրությունը լինում է այն կայքը, որն ավելի հարմար է կարդալու և ընկալելու համար:
Տառատեսակը Ձեր կայքում լուծում է հասանելության և ընթեռնելիության խնդիրը:
Տառատեսակները պետք է լինեն ոչ շատ լայն, ոչ շատ փոքր, ոչ շատ մեծ: Տառատեսակը նման է ձայնի տոնայնությանը: Այսինքն՝ տառատեսակների ընտրությունը ևս կարևոր հանգամանք է: Կարելի է միևնույն տեքստում տառատեսակների համադրում կատարել, սակայն զգուշությամբ: Ընդ որում այդ համադրությունը նախընտրելի է երկուսից ավելի չլինի:
Տառատեսակների գեղեցիկ համադրում է, երբ serif-ով գրված է վերնագիրը, sans-serif-ով՝ բովանդակությունը: Կայքում տեքստի տողերին նույնպես պետք է ուշադրություն դարձնել, տողերի երկատվածությունն ավելի ընթեռնելի է դարձնում տեքստը: Իդեալական տարբերակը 85 սիմվոլի կիրառումն է մեկ տողում:
Կայքի կառուցվածում գույները ևս մեծ նշանակություն ունեն: Գույնը ինֆորմացիա է հաղորդում:
Նախընտրելի է կայքում հրաժարվել սև գույնից, այն ծանրացնում է: Իսկ եթե ցանկություն կա մուգ գույն օգտագործելու, ապա այն կարելի է մեղմել` պաստելային գույներ ստանալ: Գույների բազմազանությունը, սակայն կայքում չի խրախուսվում. գույներն էլ պետք է սահմանափակ լինեն:
kuler.adobe.com կայքը գունային լուծումներ կատարելիս կարող է օգնական լինել:
Հանդիպում-քննարկումը կազմակերպել էր Հանրային լրագրության ակումբը, որը նախատեսված էր հայաստանյան լրատվամիջոցների ներկայացուցիչների, լրատվական կայքերի խմբագիրների, դիզայնի հետ առնչություն ունեցող մասնագետների, ուսանողների, դիզայներների, բլոգերների, լրագրողների համար:
Արփինե Արզումանյան` (mynews.am)
