Վերաքննիչ քրեական դատարանում ՀԱԿ ակտիվիստների պաշտպան Վահե Գրիգորյանը նախ սկսեց հայտարարությամբ: Նա դատարանին ներկայացրեց հոկտեմբերի 3-ին ԵԽԽՎ նստաշրջանում ընդունված 19.00 բանաձեւը, որը սահմանում է քաղբանտարկյալի որոշման չափանիշները. «Անձնական ազատությունից զրկված անհատը համարվում է քաղբանտարկյալ, եթե նրա նկատմամբ կալանքը կիրառված է մարդու իրավունքների հիմնարար ազատությունների պաշտպանության կոնվենցիայով , եթե կալանքը կիրառվել է բացառապես քաղաքական նկատառումներով, որեւէ հանցագործության հետ կալանավորի առնչության բացակայությամբ»:
Հայտարարությունը կարդալուց հետո, Վ. Գրիգորյանը վկայակոչելով ԵԽԽՎ ընդունված բանաձեւը, խնդրեց վերանայել ընդհանուր իրավասության դատարանում բողոքարկված դատավճիռը:
Ավելի ուշ միջնորդեց անազատության մեջ գտնվող Տիգրան Առաքելյանի խափանման միջոցը փոխել. «Այս պահի դրությամբ չկա որեւէ անհրաժեշտություն պաշտպանյալիս անազատության մեջ պահելու համար: Քաղբանտարկյալ լինելու առաջնային տարրը նրա՝ անազատության մեջ գտնվելն է: Հաշվի առնելով, որ չկա անհրաժեշտություն եւ հիմք պաշտպանյալիս անազատության մեջ պահելու ու հաշվի առնելով, որ նրա խափանման միջոցի փոփոխությունը էականորեն կփոխի այն մթնոլորտը, որում տեղի է ունենում դատավարությունը, դատարանին խնդրում եմ փոփոխել ու նրան ազատ արձակել կալանքից»:
Կարդացեք նաև
Այս միջնորդությունը առարկեց դատախազ Հակոբ Մարտիրոսյանը եւ ասաց, որ հիմքեր չի տեսնում Առաքելյանին քաղբանտարկյալ համարելու Վ. Գրիգորյանի պնդումներում: Նա նաեւ կոչ արեց զերծ մնալ դեկլարատիվ հայտարարություններից ու խոսել կոնկրետ ապացույցներով:
Վերաքննիչ քրեական դատարանում ավելի քան 2 ժամ խորհրդակցությունից հետո, դատավոր Արմեն Դանիելյանի նախագահությամբ, հրապարակվեց դատարանի որոշումը ակտիվիստների պաշտպան Վահե Գրիգորյանի ներկայացրած միջնորդության վերաբերյալ: Տիգրան Առաքելյանի խափանման միջոց կալանքը վերացնելու մասին միջնորդությունը բավարարելու համար դատարանը հիմքեր չի տեսնում:
Դատավոր Դանիելյանի խոսքերով, Առաքելյանի խափանման միջոց կալանքը պահպանելու անհրաժեշտությունը դեռ չի վերացել: Նա ասաց, որ խափանման միջոցը փոխելու դեպքում կարող է ամբաստանյալը դրսեւորել ոչ իրավաչափ վարաքագիծ: Ակտիվիստների պաշտպանների բացակայության պատճառով դատական նիստը հետաձգվեց մինչեւ նոյեմբերի 12-ը:
Արփինե ՍԻՄՈՆՅԱՆ
