Հարեւան Իրանի Իսլամական Հանրապետության Արեւելյան Ատրպատական նահանգի գյուղատնտեսները ցանկանում են Սյունիքի մարզի հետ համագործակցել գյուղատնտեսության ոլորտի տարբեր ուղղություններով: Հարեւան երկրի գյուղացիական տնտեսությունների ներկայացուցիչները ցանկանում են իրենց անասունները արածեցնել Սյունիքի մարզի արոտավայրերում, որի դիմաց պատրաստ են արոտավարձ վճարել կամ դրան համարժեք գյուղտեխնիկա, գյուղգործիքներ տրամադրել տվյալ համայնքին:
Սյունիքի մարզպետարանի գյուղատնտեսության եւ բնապահպանության վարչության պետ Սամվել Թանգյանը կարծում է, որ առաջարկը ձեռնտու կլինի գյուղական համայնքներին, իրենց վարչական տարածքում չօգտագործվող արոտավայրերը վարձակալությամբ տրամադրելով` գյուղտեխնիկայի կամ գյուղին հուզող այլ խնդիրները հնարավորություն կունենան լուծել: «Իրանական կողմին հետաքրքրում են մեր արոտավայրերը, ցանկանում են իրենց մանր եղջերավոր անասունները բերեն մարզի արոտավայրեում արածեցնելու, չեն թաքցնում, ասում են, որ մեր անասունների մսի որակը շատ լավն է եւ ցանկանում են այստեղի արոտավայրերում արածեցնելով` փոխել իրենց անասունների մսի համը: Եթե, օրինակի համար տվյալ համայնքի արոտավայրի վարձը կազմի 2-3 մլն դրամ, իրենք պատրաստ են գումարային վճարում կատարել կամ համայնքին անհրաժեշտ գյուղտեխնիկա տրամադրել` 2 կամ 3 տարի արածեցնելու պայմանով, դա էլ կախված է գյուղտեխնիկայի գնից: Նրանք նույնիսկ պատրաստ են այստեղ կաթի, պտղի, բանջարեղենի վերամշակման գործարաններ բացել: Առաջարկեցին 70 տոկոս ներդրում կատարվի իրենց կողմից, 30 տոկոսը` մեր կողմից` ժամանակի ընթացքում փոխադարձ պարտքերը մարելու պայմանով»,-տեղեկացրեց պարոն Թանգյանը:
2012թ-ին` նախորդ տարվա համեմատ, Սյունիքում մանր եղջերավոր անասունների գլխաքանակն աճել է 10 հազարով, իսկ խոշորինը` 550 գլխով: Անասնագլխաքանակի աճը մարզի գլխավոր գյուղատնտեսը պայմանավորում է պանրի շուկայական գնի բարձրացման եւ հարեւան երկրի կողմից ոչխարի գլխաքանակի գնման հաշվին, որից հետո մարդիկ սկսեցին ավելի շատ զբաղվել անասնապահությամբ:
Մերի ՍՈՂՈՄՈՆՅԱՆ
Կարդացեք նաև
