ՀՀԿ պատգամավոր Խոսրով Հարությունյանը վատ է վերաբերվում այն պատգամավորներին, որոնց մտքով անցել է այցելել Նաիրի Հունանյանին ու նրա եղբորը՝ Կարեն Հունանյանին, հարցնել, թե ինչպես են ու պարզել, որ հոգեկան խնդիրներ ունեն:
Նա Aravot.am-ի հետ զրույցում ասաց. «Իմ մտքով անգամ դա չէր անցնի: Ինձ շատ դժվար է այդ թեմայով խոսել, ես ինքս նստած եմ եղել Վազգեն Սարգսյանի կողքին: Ես որեւէ խոսք նույնիսկ չեմ կարողանում գտնել՝ այդ արարքը գնահատելու կամ բնութագրելու համար: Հայոց հարուստ բառապաշարն այդ առումով բավականին տկար է եւ անօգնական: Ուր մնաց թե հիմա փորձել գնալ եւ հարցնել նրանց որպիսությունը: Ես ընդունում եմ մարդու իրավունքներ, եւ այլն, եւ այլն, ես այդ ամեն ինչը հասկանում եմ, բայց կներեք, դրան էլ սահման կա: Ինձ այդ խմբի ինչպիսին լինելը բացարձակապես չի հետաքրքրում: ԲՀԿ պատգամվորները թող գնան: Ինձ բացարձակապես նրանք չեն հետաքրքրում: Ցանկացած այլ ոճրագործի ճակատագրով կարելի է հետաքրքրվել, բայց ոչ նրանց: Նրանք ինձ համար ազգի դավաճաններ են, վերջ»:
Մեր դիտարկմանը, որ լուրեր կան, որ նրանք հոգեկան խնդիրներ ունեն՝ Խոսրով Հարությունյանն այսպես արձագանքեց. «Ի՞նչ անեմ, որ հոգեկան խնդիրներ ունեն: Կներեք, պետք է 98-99-ին այդ մասին մտածեին, ոչ թե այսօր: Ես չեմ կարծում, որ նրանք այն ժամանակ էլ հոգեկան շատ լավ վիճակում էին: Ամեն մի պատգամավոր իր վարքագծի տերն է: Ես, օրինակ, ձեռնպահ կմնայի նման քայլից»:
Հռիփսիմե ՋԵԲԵՋՅԱՆ
Կարդացեք նաև
