Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Արայիկ Մելքումյանը հրապարակեց Հմայակ Հովհաննիսյանի դեմ Սենիկ Ջուլհակյանի հայցով դատական ակտը:
Հայցվոր Ս.Ջուլհակյանն իրեն հասցված վիրավորանքի ու զրպարտության համար պահանջել էր, որպեսզի Հմայակ Հովհաննիսյանը հրապարակային ներողություն խնդրի եւ զրպարտչական տեղեկությունները հերքի:
Այս գործով ինքնուրույն պահանջ չներկայացնող կողմ էին ճանաչվել մի շարք լրատվամիջոցներ, մասնավորապես՝ «Հրապարակը», «Մուլտի Մեդիա Թիվին», «Արմենիա» հեռուստաընկերությունը, «Հայելի» ակումբը, lurer.com-ը, «Հենարան» ակումբն ու «Դիալոգ» վերլուծական կենտրոնը:
Հմայակ Հովհաննիսյանը Սենիկ Ջուլհակյանի մասին ասել էր.«Դա մաշեննիկ է, որեւէ սեփականություն չունի: Իրեն ձեւացնում է լուրջ բիզնեսմեն, այնինչ, ոչ մի բաժնետոմս չունի, ընդամենը ֆիրմայի առեւտրային ներկայացուցիչ է Սուրգուտ քաղաքում եւ զբաղվում է լյուստրաների վաճառքով», «ՀայՀիդրոնախագիծ» ինստիտուտի տարածքն օտարվել է մի կասկածելի անձնավորության», «մաշեննիկի», որը պատրաստվում է իր ձեռքից խլել միության տարածքը»:
Կարդացեք նաև
Դատարանը վիրավորական էր համարել նաեւ «Նա անհաջող ավանտյուրիստ է, ով վտանգ է ներկայացնում», «չակերտավոր բարերար», եւ նման մի շարք արտահայտությունները:
Այսօր սպասվում էր, որ պետք է հրապարակվի դատական ակտը, մինչդեռ դատարանը որոշում ընդունեց հայցի քննությունը վերսկսելու մասին: Դատական հաջորդ նիստը նշանակվեց նոյեմբերի 15-ին:
Ռուզան ՄԻՆԱՍՅԱՆ
