Ըստ Տավուշի մարզպետարանի գյուղատնտեսության եւ բնապահպանության վարչության՝ Տավուշի մարզում գինու եւ կոնյակի գործարաններն այս տարի ընդհանուր առմամբ ընդունել են 7426 տոննա խաղող: Ըստ նույն աղբյուրի՝ «Իջեւանի գինու , կոնյակի գործարան» ԲԲԸ-ն մթերել է 706 տոննա խաղող: Նշենք, որ այդ գործարանն ընդունել է միայն սեւ խաղող: Այդ պատճառով իջեւանցի խաղողագործները ստիպված էին հավելյալ ծախսեր կատարելով՝ հանձնելու համար խաղողը տեղափոխել Բերդի եւ Նոյեմբերյանի տարածաշրջաններ:
« Իջեւանի գինու, կոնյակի գործարան» ԲԲԸ գինեգործ Ռոբերտ Իսկանդարյանն ասաց, որ ընդունել են միայն իրենց ընկերությանը պատկանող, Բաղրամյանում գտնվող այգիների սպիտակ խաղողը: Նա չցանկացավ պատասխանել, թե ինչո՞ւ միայն իրենց ընկերության այգիների սպիտակ խաղողն են ընդունել: Գործարանի տնօրեն Ատոմ Եգորյանն ասաց, որ այդ պահին իրեն համար չէ մեր հարցերին պատասխանել: Իջեւանի գինու, կոնյակի գործարանը մթերված բերքի համար մինչ այժմ խաղողատերերի մի մասին է վճարել: Տավուշի մարզպետարանի գյուղատնտեսության եւ բնապահպանության վարչության տվյալներով՝ «Երեւանի շամպայն գինիների գործարան» ԲԲԸ Դեբեդավանի մասնաճյուղն այս տարի ընդունել է 1400 տոննա խաղող: Սակայն գործարանից տեղեկացանք, որ ընդունել են շուրջ 1000 տոննա խաղող , որի գումարի մի մասը վճարվել է, մնացածը կվճարվի մեկ ամսվա ընթաղքում:
Ըստ Տավուշի մարզպետարանի՝ «Երեւանի կոնյակի գործարան» ՓԲԸ Բերդի մասնաճյուղն ընդունել է 3000 տոննա խաղող: Ընկերության Բերդի մասնաճյուղի տնօրեն Գարիկ Վարդանյանը հայտնեց, որ իրենք ընդունել են 2946 տոննա 500 կգ խաղող, որի գումարները վճարվել են: Սակայն այդտեղ ընդունել են միայն կոնյակի արտադրության համար պիտանի «Ռիկացիտելի» եւ «Բանանց» սորտերի խաղող:
Կարդացեք նաև
Հանրապետության այլ մարզերում խաղողն ընդունվել է կիլոգրամը 140 դրամով, շաքարայնության ավելի բարձր տոկոս ունեցող Տավուշի մարզի խաղողը վերամշակող 5 գործարաններն ընդունել են 130 դրամով:
Ոսկան ՍԱՐԳՍՅԱՆ
