Երևանի Ավան և Նոր Նորք վարչական շրջանների ընդհանուր իրավասության դատարանում, դատավոր Էդուարդ Ամալյանի նախագահությամբ քիչ առաջ սկսվեց քաղաքացի Դավիթ Սանասարյանն ընդդեմ Ազգային ժողովի նախկին պատգամավոր Ռուբեն Հայրապետյանի գործով նախնական դատական նիստը:
Դ. Սանասարյանը իր բարի համբավի, պատվի, արժանապատվության եւ գործարար համբավին պատճառված վնասի հատուցման մասին հայց է ներկայացրել եւ պահանջում է հրապարակայնորեն հերքել ֆրանսիական ամսագրում Դ. Սանասարյանի մասին հայտարարությունները: Ռ. Հայրապետյանի ներկայացուցիչներ Կարեն Պետրոսյանն ու Սայադ Բադալյանը առարկություն ներկայացրին հայցվորի ներկայացուցիչ Մհեր Արշակյանի վերաբերյալ: Նրանք դատարանին տեղեկացրին, որ հայցվորի ներկայացուցիչը եւս երկու հայց է ներկայացրել դատարան, որոնք ընդունվել են վարույթ: Նշենք, որ խոսքը վերաբերում է ազգագրագետ Հրանուշ Խառատյանի եւ Գարեգին Չուգասզյանի հայցերին: Նրանք եւս նույն հայցով դատարան են դիմել ընդդեմ Ռուբեն Հայրապետյանի: Դատարանը 15 րոպե ժամանակ տրամադրեց, որ պարոն Հայրապետյանի ներկայացուցիչները առարկությունը ներկայացնեն գրավոր: Ընդմիջումից հետո հայցվորի ներկայացուցիչը դատարանից 30 րոպե խնդրեց առարկությունն ուսումնասիրելու եւ իր կարծիքը ներկայացնելու համար:
Արփինե ՍԻՄՈՆՅԱՆ
