Կոնսերվանտը ըստ երևույթի կարող է դանդաղեցնել կամ նույնիսկ դադարեցնել գլխի և պարանոցի քաղցկեղի որոշ տեսակներ
ԱՄՆ-ի Միչիգան նահանգի համալսարանի հետազոտությունների արդյունքների համաձայն, լայն օգտագործում ունեցող սննդի կոնսերվանտը ըստ երևույթի կարող է դանդաղեցնել կամ նույնիսկ դադարեցնել գլխի և պարանոցի քաղցկեղի որոշ տեսակներ:
Գիտնականները հայտնաբերել են, որ հակամանրէային «նիզին» անվանում ունեցող նյութը ակտիվացնում է սպիտակուցի մի տեսակ, որը նպաստում է քաղցկեղի բջիջների մահվան, սակայն որևէ վնաս չի հասցնում առողջ բջիջներին:
Բերանի խոռոչի քաղցկեղը աշխարհում մահաբեր հիմնական հիվանդություններից է: Այս հիվանդությունը հայտնաբերելուց հետո հիվանդների 40-ից 60 տոկոսը մահանում է հինգ տարվա ընթացքում:
Նիզինը լայն օգտագործում ունեցող հակամանրէային նյութ է, որն արդյունավետորեն օգտագործվում է ստաֆիլոկոկային վարակների և բութուլիզմի, ինչպես նաև պարենային ապրանքներին վնաս հասցնող բազմաթիվ այլ գործոնների դեմ: Առողջապահության համաշխարհային կազմակերպությունը և ԱՄՆ-ի սննդի և դեղորայքի գործակալությունը մի քանի տասնամյակ առաջ են հավանության արժանացրել նիզինը՝ ճանաչելով այն պիտանի մարդու սպառման համար:
Միչիգանի համալսարանի անասնաբուժության ֆակուլտետի կողմից իրականացված հետազոտության ղեկավար, պրոֆեսոր Իվոն Կապիլայի համաձայն, նախատեսվում է դիմել ԱՄՆ-ի սննդի և դեղորայքի գործակալությանը՝ նիզինի հակաքաղցկեղային հատկությունները կլինիկական փորձերի միջոցով ստուգելու համար:
Արմեն Հովհաննիսյան
«Ամերիկայի Ձայն»
