ԱԺ Հանրապետական խմբակցության պատգամավոր Սամվել Ֆարմանյանը Ֆեյսբուքյան իր էջում գրառում է կատարել, որտեղ հարցեր է ուղղում «Բարգավաճ Հայաստան» կուսակցությանը: Նա հարց է բարձրացնում. «Այդ ո՞ր հարցերում է դրսևորվում ԲՀԿ-ի այլընտրանքայնությունը: Եթե դա իսկապես այդպես է, ապա պետք է որ առաջնային դրսևորումներ ստանա նաև մի ոլորտում, որի մասին այդքան շատ խոսվում է և քննարկվում, նաև՝ քննադատվում. խոսքը Հայաստանի Հանրապետության արտաքին քաղաքականության մասին է: Որպեսզի գոնե այս մասով Բարգավաճ Հայաստանը փաստարկի իր քաղաքական այլընտրանքայնությունը, կուսակցությունը պարտավոր է վերջապես համակարգված ներկայացնել իր մոտեցումները մեր պետությանը հուզող արտաքին քաղաքական ու անվտանգային քաղաքականության հետևյալ առանցքային խնդիրների շուրջ»:
ՀՀԿ-ական պատգամավորը հետաքրքրված է ԲՀԿ-ի դիրքորոշումներով ԼՂՀ հիմնախնդրի, ՀՀ-ՌԴ, ՀՀ-ԵՄ, ՀՀ-ԱՄՆ, ՀՀ-Թուրքիա հարաբերությունների առումով, Հայաստանի ռազմաքաղաքական ու անվտանգային առաջնահերթությունների, տարածաշրջանային առկա կոնֆլիկտների, հետխորհրդային տարածքում ինտեգրացիոն գործընթացների վերաբերյալ:
Aravot.am-ը ԱԺ ԲՀԿ խմբակցության քարտուղար Նաիրա Զոհրաբյանից փորձեց ստանալ Ս. Ֆարմանյանի հնչեցրած հարցերի պատասխանները: Տիկին Զոհրաբյանն ասաց. «Հիմա ծանրաբեռնված ենք բյուջեի քննարկումներով, երբ ազատ ժամանակ ունենանք սիրով պատրաստ ենք Սամվել Ֆարմանյանին հրավիրել մեր խմբակցություն և մեկ բաժակ սուրճի կամ թեյի շուրջ մանրամասն պատասխանել իր առաջադրած բոլոր հարցերին»: Մեր հարցին՝ Ս. Ֆարմանյանը շա՞տ պետք է սպասի, տիկին Զոհրաբյանն այսպես պատասխանեց. «Երբ որ մենք ժամանակ ունենանք»: ԲՀԿ մամուլի խոսնակ Տիգրան Ուրիխանյանն էլ տեղյակ չէր Ս. Ֆարմանյանի հարցադրումներից: Պարոն Ուրիխանյանը պատճառաբանեց, թե ինչո՞ւ ինքը պետք է կարդա Ֆեյսբուքում ուրիշի անձնական էջերը: Երբ ՀՀԿ-ական պատգամավորի բարձրացրած մի քանի հարցեր փոխանցեցինք, Տ. Ուրիխանյանը պատասխանեց. « Այդ հարցերի պատասխանները բազմիցս հնչել են: Անկեղծ ասած հարցերի իմաստը չեմ հասկանում, եթե կան հարցեր, որոնց վերաբերյալ ինքը տեղյակ չէ, այդ հարցերի պատասխանները բազմիցս տրվել են: Բազմաթիվ անգամներ ներկայացված կարծիքներ»:
Կարդացեք նաև
Մեր այն հարցին՝ արդյոք ԲՀԿ-ն գրավոր, կամ ինչ-որ ձևով կպատասխանի՞ Ս. Ֆարմանյանին, Տ. Ուրիխանյանն այսպես պատասխանեց. «Ֆեյսբուքում սեփական էջում գրառումների վերաբերյալ ԲՀԿ-ն պիտի գրավոր պատասխա՞ն ուղարկի»:
Մեր մյուս հարցին՝ Տ. Ուրիխանյանն ի՞նչ է կարծում, ինչո՞ւ հանկարծ Ս. Ֆարմանյանին հետաքրքրեցին այս հարցերի պատասխանները, արդյոք նրա գրառման մեջ կա՞ ենթատեքստ, ԲՀԿ մամուլի խոսնակն արձագանքեց. «Ենթադրում եմ տեղեկացված չէ և հետաքրքրասիրությունից դրդված հետաքրքրվում է, քանի որ որևէ մութ պահ կամ ինտրիգ առաջացնող հանգամանք մեր դիրքորոշումներում չկա և չի կարող լինել այդ հարցերի շուրջ»:
Տաթև ՀԱՐՈՒԹՅՈՒՆՅԱՆ
