Տորոնտոյում անցկացվող թվով 7-րդ ամենամյա «Նուռ» կինոփառանոտը (POM) պաշտոնապես ավարտվեց հոկտեմբերի 21-ին: Փառատոնը անցկացվեց հոկտեմբերի 18-21-ը, և այդ չորս օրը չափազանց հաջողված ստացվեց: 12 երկրներից ներկայացվեցին 34 տարբեր ֆիլմեր, որոնցից 10-ը համաշխարհային պրեմիերա էին, ինչը նոր ռեկորդ է փառատոնի համար: Գրում է «Արմենիա ուիքլի» պարբերականը:
«Եվս մեկ անգամ «Նուռ»-ն իրեն ամբողջությամբ արդարացրեց, – փառատոնի հաղորդակցության և մարքեթինգի տնօրեն Ջեյքոբ Պորպոսյանի խոսքն է փոխանցում պարբերականը, – ֆիլմերի մեր ճիշտ ընտրությունը շատ լավ ընդունվեց ու օգնեց նոր ռեկորդ սահմանել» :
Փառատոնի լավագույն խաղարկային ֆիլմ է ճանաչվել Նիկոլաս Թաքյանի «Ազադ» ֆիլմը, իսկ նույն անվանակարգում պատվո մրցանակին արժանացավ պրոդյուսեր Լառա Չեքերջյանը «Ո՞ւր ենք մենք գնում հիմա» ֆիլմի համար: Լավագույն կարճամետրաժ ֆիլմ է ճանաչվել Էրիկ Դինքյանի «Յուկիկո» ֆիլմը, նույն անվանակարգում պատվո մրցանակի արժանացան Օկսանա Միրզոյանը՝ իր «140 դրամ» ֆիլմի համար և Լուսկա Խալափյանը՝ «Յոթերորդը» ֆիլմի համար: Լավագույն վավերագրական ֆիլմ է ճանաչվել Գարի և Ցեզար Գանանյանների «Հայկական ռափսոդիա» ֆիլմը, իսկ պատվո մրցանակը տրվել է Կայ Մուրադյանին իր «Մորս ձայնը» ֆիլմի համար:
«Նուռ» կինոփառատոնը կազմակերպում է Կանադայի «Համազգային» կենտրոնը:
Պատրաստեց Հովհաննես ԻՇԽԱՆՅԱՆԸ
