Այսօր «Անի Պլազա» հյուրանոցում տեղի ունեցավ «Հայաստանի հմտություններ» ազգային մրցույթի փակման հանդիսավոր արարողությունը: Հոկտեմբերի 24-26-ը կայացած մրցույթի ոսկերչություն, նորաձեւություն եւ խոհարարություն մասնագիտությունների գծով հաղթած ուսանողները ներկայացրեցին իրենց աշխատանքները:
2013թ-ի հուլիսի 2-7-ը Գերմանիայի Դաշնային Հանրապետության Լայպցիգ քաղաքում Հայաստանի ՄԿՈՒ հաստատությունների ուսանողներն առաջին անգամ հնարավորություն կունենան մրցել 61 այլ երկրի ուսանողների հետ` «Համաշխարհային հմտություններ» միջազգային մրցույթում:
«Հայաստանի հմտություններ» նախագիծը իր շուրջը միավորել է ՀՀ Կրթության եւ գիտության նախարարությանը, Կրթության ազգային ինստիտուտի մասնագիտական կրթության եւ ուսուցման զարգացման ազգային կենտրոնին, ինչպես նաեւ` սոցիալական գործընկերներին` ՀՀ առեւտրաարդյունաբերական պալատին, Հայաստանի գործարարների եւ արդյունաբերողների միությանը եւ Հայաստանի գործատուների միությանը:
Կարդացեք նաև
Բացման խոսքով հանդես եկած ԿԳ նախարար Արմեն Աշոտյանը փաստեց, որ վերջին տարիներին միջին եւ նախնական մասնագիտական կրթությունը դուրս է եկել բարձրագույն համակարգերի ստվերից. «Պետության կողմից մեծ ջանքեր են գործադրվել, որպեսզի միջին մասնագիտական կրթությունը վերագտնի իր արժանիքները Հայաստանի կրթական համակարգում: Գաղտնիք չէ, որ Հայաստանն այսօր ունի որակյալ աշխատուժի պակաս, եւ որ երկար տարիներ հասարակության երիտասարդ հատվածը համակված էր մոլուցքով` բոլոր հնարավոր միջոցներով ստանալ բացառապես բարձրագույն կրթություն: Այդ երիտասարդների զգալի մասն այսօր գործազուրկ է, որովհետեւ չի տիրապետում համապատասխան հմտությունների` չգտնելով աշխատաշուկայում իր տեղը»:
Նախարարի խոսքով` ուրախալի է այն փաստը, որ պետության ջանքերի շնորհիվ վերջին տարիներին մասնագիտական կրթությունը դարձել է առավել գրավիչ. «Միայն այս տարում կրթությունը շարունակելու նպատակով 11.000 երիտասարդի ընտրություն կանգ է առել մասնագիտական կրթություն ապահովող հաստատությունների վրա: Իրականում ուսումնարանները եւ քոլեջները սկսել են մատուցել գործատուների կողմից ակնկալվող կրթության մակարդակ: Իհարկե, անելիքներ շատ կան, քանի որ դեռեւս ամբողջությամբ կյանքի չեն կոչվել բարեփոխումները: Այդ ճանապարհին ապավինում ենք թե միջազգային եւ թե հայաստանյան գործընկերների աջակցությանը»:
Արմեն Աշոտյանը պարգեւատրեց մրցույթի հաղթող մասնակիցներին, իսկ ուսումնական հաստատությունների համապատասխան վարպետները նախարարության շնորհակալագրեր ստացան:
Նախարարը վստահ է, որ ազգային օլիմպիադայի հաղթողները պատշաճ կերպով հանդես կգան Գերմանիայում. «Մեր երիտասարդներն ունեն հմուտ ձեռքեր եւ սիրով են կատարում կամովի ընտրած իրենց աշխատանքը: Կրթության համակարգում նախարարության համար չկան սիրելի եւ խորթ զավակներ, մենք շարունակելու ենք կառուցողական մոտեցում ցուցաբերել բոլոր կրթական հաստատություններին»:
Լուիզա ՍՈՒՔԻԱՍՅԱՆ
