Նոյեմբերի 2-ին, ժամը 16.00-ին, Վազգեն Սարգսյանի անվան «Հանրապետական» մարզադաշտում կկայանա «ՀՀ վարչապետի գավաթ-2012» ֆուտբոլային մրցաշարի եզրափակիչ խաղը՝ ՀՀ պաշտպանության ու ՀՀ կրթության և գիտության նախարարությունների թիմերի միջև:
Մրցաշարի կիսաեզրափակիչ երկու հանդիպումները տեղի ունեցան հոկտեմբերի 26-ին Աբովյան քաղաքի մարզադաշտում: Հանդիպեցին ՀՀ պաշտպանության նախարարության և ՀՀ ոստիկանության, ՀՀ կրթության և գիտության նախարարության և ՀՀ դատախազության թիմերը: ՀՀ պաշտպանության նախարարությունը, լրացուցիչ ժամանակի և 11-մետրանոցների արդյունքում 9:8 հաշվով հաղթեց ՀՀ ոստիկանությանը և վաստակեց եզրափակչի ուղեգիր: ՀՀ կրթության և գիտության նախարարությունը 2:1 հաշվով հաղթեց ՀՀ դատախազությանը:
«ՀՀ վարչապետի գավաթ-2012» ֆուտբոլային մրցաշարին, որը մեկնարկել է սեպտեմբերի 25-ին, մասնակցել են պետական կառավարման 14 գերատեսչությունների ֆուտբոլային թիմեր: Թիմերը բաժանված են եղել 2 ենթախմբերի՝ 7-ական թիմերով: Խաղերը կայացել են Երևանի «Փյունիկ» ակումբի, Աշտարակի և Աբովյան քաղաքների մարզադաշտերում
«ՀՀ վարչապետի գավաթ» ֆուտբոլային մրցաշարը մեկնարկել է 2009 թվականին և անցկացվում է արդեն 4-րդ անգամ: Մրցաշարի հիմնադիրը Հայաստանի Հանրապետության կառավարությունն է, անմիջական կազմակերպիչը և անցկացնողը ՀՀ սպորտի և երիտասարդության հարցերի նախարարությունը: Մրցաշարն իրականացվում է Հայաստանի ֆուտբոլի ֆեդերացիայի աջակցությամբ, որը տրամադրում է մրցավարական կազմը և մարզագույքը:
«ՀՀ վարչապետի գավաթ» ֆուտբոլային մրցաշարը աննախադեպ մասսայական միջոցառում է, որի նպատակն է նպաստել պետական կառավարման մարմինների աշխատակիցների ֆիզիկական ակտիվացմանը, նրանց շրջանում մասսայական սպորտի և առողջ ապրելակերպի արմատավորմանը և աշխատանքա- բարեկամական կապերի ամրապնդմանը:
«ՀՀ վարչապետի գավաթ-2012» մրցաշարի 1-ին, 2-րդ, 3-րդ տեղերը գրաված թիմերը կպարգևատրվեն համապատասխանաբար 600.000, 400.000 և 200.000 դրամ պարգևավճարներով, գավաթներով, մեդալներով ու մարզահագուստներով:
ՀՀ սպորտի և երիտասարդության հարցերի նախարարության
Տեղեկատվության և հասարակայնության հետ կապերի բաժին
