Վերջին շրջանում ՀՀ ԱԺ մարդու իրավունքների պաշտպանության եւ եվրաինտեգրացման մշտական հանձնաժողովի անդամներն այցելում են քրեակատարողական հիմնարկներ` ծանոթանալու կալանավորների բնակության պայմաններին: Հերթական այցն ուրբաթ օրն էր` ԱԱԾ մեկուսարան: Այցից հետո մամուլում հակասական հրապարակումներ եղան, այն մասին, թե ԱԱԾ մեկուսարանում ինչ խոսակցություն են ունեցել պատգամավորները «հոկտեմբերի 27»-ի գործով ցմահ դատապարտյալ Նաիրի Հունանյանի հետ: Aravot.am-ը ԲՀԿ խմբակցության պատգամավոր Վահե Էնֆիաջյանից խնդրեց հստակեցնել` ի վերջո ի՞նչ են խոսել Նաիրի Հունանյանի հետ:
«Առանձնակի խոսակցություն չի եղել: Ընդամենը խցի դուռը բացվել է եւ մենք ցանկացել ենք տեսնել այն միջավայրը, որտեղ իր հանգրվանն է ստացել Նաիրի Հունանյանը»,- ասաց պարոն Էնֆիաջյանը:
Ըստ՝ «168 ժամի» հրապարակման, Վահե Էնֆիաջյանը Հունանյանին հարցրել է, թե արդյո՞ք նա փոշմանել է իր արածի համար: Նաիրի Հունանյանն էլ ի պատասխան մասնավորապես ասել է, որ իրենց բոլորի հոգիներն իր մեջ են: Համենայն դեպս, իր արածի համար զղջման կամ փոշմանելու մասին ոչ մի խոսք չի ասել: Այս առնչությամբ պրն Էնֆիաջյանն «Առավոտին» հայտնեց. «Մենք ընդհանուր շրջել ենք ամբողջ տարածքով ու տարբեր կալանավորների հետ շփվելով տարբեր հարցեր ենք տվել: Կոնկրետ իր վրա էդպես չենք կենտրոնացել: Պարզապես հետաքրքիր է եղել, թե բանտախցում ինչ պայմաններ են»: Թե ի՞նչ պայմաններ էին Հունանյանի բանտախցում, ըստ Վահե Էնֆիաջյանի` «առանձնապես ոչ էլ տարբերվում հարեւանությամբ գտնվող կալանավորների պայմաններից»:
Հիշեցնենք, որ տարբեր քրեակատարողական հիմնարկներ այցերի տպավորությունները պատգամավորները պետք է վերլուծեն եւ նոյեմբերի 20-ին տեղի ունենալիք լսումների ժամանակ արդեն հստակ առաջարկներով հանդես գան:
Կարդացեք նաև
Խմբի անդամներ Նաիրա Զոհրաբյանն ու Էլինար Վարդանյանը կարծիք էին հայտնել, որ ԱԱԾ մեկուսարանում առավել լավ պայմաններ էին, քան մյուս մեկուսարաններում: Հետաքրքրվեցինք` կիսո՞ւմ է Էնֆիյաջյանն այս կարծիքը: Պատասխանը եղավ. «Այո»:
Նելլի ԳՐԻԳՈՐՅԱՆ
