«Փառատոնը մանկական մուլտֆիլմերի ֆեստիվալ չէ, նկարված են նույն մեծահասակների թեմաները շոշափող ֆիլմեր, սակայն չենք կարող մոռանալ երեխաներին` ունենք մանկական ծրագիր եւ համագործակցում ենք Խնկո- Ապոր անվան մանկական գրադարանի հետ, մանուկները կարող են գնալ այնտեղ եւ նայել ֆիլմերը: Ցանկը հետաքրքիր է, փորձել ենք լավագույն ֆիլմերը բերել, նոր ֆիլմեր են եւ հնարավորություն է ընձեռվում հայ հանդիսատեսին իսկապես արվեստի գործեր դիտելու»,- այսօր լրագրողների հետ հանդիպման ժամանակ նշեց «ՌեԱնիմանիա» միջազգային անիմացիոն 4-րդ կինոփառատոնի գեղարվեստական ղեկավար Լուսինե Քասարջյանը:
Նոյեմբերի 3-9-ը Երեւանում կմեկնարկի «ՌեԱնիմանիա» միջազգային անիմացիոն 4-րդ կինոփառատոնը:
Փառատոնի շրջանակներում կներկայացվեն մրցութային եւ հատուկ ծրագրեր, կլինեն պրեմիերաներ, հրավիրյալ հյուրերի կողմից կանցկացվեն վարպետության դասեր: Փառատոնն ունի 6 մրցութային ծրագրեր` լիամետրաժ, կարճամետրաժ, ավարտական, երաժշտական, հեռուստատեսային/գովազդ, ինչպես նաեւ մանկական ընտրություն:
Փառատոնի հիմնադիր Վրեժ Քասունին կինոփառատոնը երջանիկ փաստ համարեց: Այն կրելու է շարունակական բնույթ եւ հաղթահարվելու են բոլոր խնդիրները.
«Բացմանը սպասում ենք անհամբեր, հյուրերի քանակը քիչ է, սակայն որակ կա: Հայաստանի անիմացիոն կինոն լավ դիրքում է: Աշխատասիրության եւ լավ թիմերի շնորհիվ մենք կհասնենք հաջողությունների: Փառատոնը հանդիպման կետ է հանդիսանում միջազգային վարպետների եւ մեր հայրենակիցների հետ: Այս տարի փառատոնին կհյուրընկալեն անիմատորներ Բրազիլիայից, Գերմանիայից եւ Ռուսաստանից, որոնք կանցկացնեն վարպետության դասընթացներ եւ սեմինարներ»:
Ժամանակակից արվեստի վարչության պետի տեղակալ Արամ Գյուրջյանի պնդմամբ՝ ՀՀ մշակույթի նախարարության համար փառատոնը պարզապես մշակութային միջոցառում չէ, այն լուրջ ստրատեգիական հենակետ է, որը համահունչ է.
«Բոլոր մարդիկ պետք է միավորվեն, խոսում ենք դժվարություններից, սակայն աշխատակազմը ցանկանում է ստեղծել բարին եւ կրկնապատկել այն: Մուլտերը ներկայացվելու են ամենապահանջկոտ հանդիսատեսին` երեխաներին, նրանք են ձեւավորում մեր վաղվա տեսակը: Կարծում եմ՝ թիմը նվիրվյալների է, պարզապես մաղթում եմ բարի մեկնարկ»:
Փառատոնում կներկայացվի մոտ 400 ֆիլմ՝ աշխարհի 40-ից ավելի երկրից: Ֆիլմերը կցուցադրվեն «Մոսկվա» եւ «Նաիրի» կինոթատրոններում, «Նարեկացի» մշակութային կենտրոնում, Մալյանի անվան թատրոնում, Խնկո -Ապոր անվան մանկական գրադարանում, «Բուրբոն» ակումբում, ինչպես նաեւ «Թումո» կենտրոնում եւ «Այբ» կրթահամալիրում:
Անժելա ՇԱՀՈՒՄՅԱՆ
