«ԱՄՆ-ի նախագահական ընտրությունները խիստ մրցակցային են, որը ցույց է տալիս ժողովրդավարության դինամիկ ուժը: Այդ նախագահական ընտրությունները քաղաքական ուժերի եւ անձերի ընտրություններն են, որոնցից էլ կախված է՝ ինչպես կզարգանա ԱՄՆ-ը»,- այսօր «Հենարան» ակումբում խոսելով ԱՄՆ-ի նախագահական ընտրություններից՝ ասաց Տարածաշրջանային հետազոտությունների կենտրոնի տնօրեն, քաղաքագետ Ռիչարդ Կիրակոսյանը, ըստ որի՝ նախագահական ընտրությունները ԱՄՆ-ում տվեցին փողի ազդեցությունը, ինչը արտահայտված է նաեւ Հայաստանում: «Հայաստանում փողն է քաղաքականությունը եւ շատ օլիգարխներ շարունակում են տեղեր զբաղեցնել խորհրդարանում»,-հավելեց նա: Ըստ Կիրակոսյանի՝ հայկական լոբբի ուժեղացման միտում կա ԱՄՆ-ում, ու այն կշարունակվի հզորանալ մինչեւ 2015 թվականը, որն էլ Հայոց ցեղասպանության ճանաչման ջանքերն ավելի կարեւոր է դարձնում եւ կնշանավորվի նրանով, որ Հայոց ցեղասպանության 100-ամյակի հետ կապված ցեղասպանության ճանաչման խնդիրը առաջ կքաշվի աշխարհի մի շարք երկրներում եւ դա մարտահրավեր կլինի Թուրքիայի համար: Կիրակոսյանի համոզմամբ՝ հայ-ամերիկյան հարաբերություններն անփոփոխ կմնան անկախ այն բանից, թե ով կդառնա ԱՄՆ նախագահ: «Ցեղասպանության խնդրի հետ կապված՝ փոփոխություն չի լինի, որը ցույց է տալիս ամերիկյան քաղաքականության բարոյականության պակասը: Բայց Ռոմնիի ընտրվելու դեպքում կսրվեն ռուս- ամերիկյան հարաբերությունները, քանի որ նա հակված է առճակատելու Ռուսաստանի հետ, որը հաստատ վատ կանդրադառնա Հայաստանի վրա: Ռոմնին ավելի վտանգավոր է եւ անտարբեր ԼՂՀ հարցի նկատմամբ ու չի հասկանում հարցի խորությունը»,- համոզված է քաղաքագետը: Կիրակոսյանը խոսելով նաեւ Նալբանդյան- Մամեդյարով հանդիպման մասին՝ նշեց, որ այդ հանդիպումը կարեւոր էր նրանով, որ արտգործնախարարները հանդիպեցին Ադրբեջանի անպատասխանատու կեցվածքից հետո: Բացի այդ. «Սա նաեւ փորձություն էր ԵԱՀԿ Մինսկի խմբի եւ միջազգային հանրության համար: Ոչինչ չպետք էր ակնկալել այդ հանդիպումից, բայց Հայաստանը ճիշտ արեց, որ դուրս չեկավ բանակցային գործընթացից: Բայց Արցախը պետք է դառնա բանակցային կողմ ու քանի դեռ նա բանակցային գործընթացին չի մասնակցում, նոր բան ակնկալելու կարիք չկա»,-ավելացրեց քաղաքագետը:
Եվա ՀԱԿՈԲՅԱՆ
