Ադրբեջանը հայտարարել է, թե պլանավորել է մասնակցել նոյեմբերի 25-ին Երեւանում մեկնարկող բռնցքամարտի աշխարհի երիտասարդական առաջնությանը: Սակայն այդ երկրի բռնցքամարտի ֆեդերացիայի փոխնախագահ Աղաջան Աբիեւը «Azerisport»-ին օրերս հայտարարել էր, թե հայկական կողմը դեռ անվտանգության գրավոր երաշխիքներ չի տվել եւ միայն համապատասխան նամակը ստանալուց հետո իրենք կմեկնեն Երեւան:
Aravot.am-ն այսօր ճշտեց, որ հոկտեմբերի 26-ին` հայտերի ընդունման վերջնաժամկետի օրը, ադրբեջանական պատվիրակության, ինչպես նաեւ Երեւան ժամանող բոլոր պատվիրակությունների անվտանգության երաշխիքներն ապահովելու բովանդակությամբ նամակ ՀՀ սպորտի եւ երիտասարդության հարցերի նախարար Հրաչյա Ռոստոմյանի ստորագրությամբ ուղարկվել է բռնցքամարտի միջազգային ֆեդերացիա (AIBA) եւ այնտեղից ստացվել պատասխան, որ նամակը տեղ է հասել: Այնպես որ, հարեւան երկրի բռնցքամարտիկները հանգիստ կարող են գալ Հայաստան:
Աշոտ ՀԱԿՈԲՅԱՆ
