Մի քանի օր առաջ Իջեւանի քաղաքապետարանի շենքին կողքին, կանաչապատ տարածքում մալուխ է անցկացվել, բնական գազի վետգետնյա խողովակների ապամոնտաժման աշխատանքներ են արվել: Այդ տարածքում սկսվում է «Արարատ» բանկի մասնաճյուղի գրասենյակի շինարարությունը:
Իջեւանի քաղաքապետ Վարդան Ղալումյանը ներկայումս գտնվում է Ռումինիայում: Փոխքաղաքապետ Սուրեն Մանուկյանը հայտնեց, որ այդ տարածքը պատկանում է քաղաքապետարանի շենքի հարեւանությամբ գործող սրճարանի՝ Վարդան անունով տիրոջը:
Փոխքաղաքապետին հարցրեցինք` կանաչապատ,ծառերով հագեցած տարածքում օրենքով չի՞ արգելվում կապիտալ շինարարությունը: Նա ասաց, որ սրճարանի սեփականատերը 2002թ. այդ տարածքը ձեռք է բերել հասարակական կառուցապատման իրավունքով, եւ իրեն հատկացված տարածքից 200 քառակուսի մետր, 60 հազար դոլարով վաճառել է «Արարատ» բանկին:
Կարդացեք նաև
Քաղաքապետի տեղակալն ասաց, որ բանկը քաղաքաշինության նախարարությունից ստացել է շինարարության համար անհրաժեշտ փաստաթղթերը, Իջեւանի քաղաքապետարանն էլ տրամադրել է շինթույլտվություն: Ս. Մանուկյանի խոսքերով` շինարարության հետեւանքով տարածքի տեսքը չի տուժի, բանկի պատասխանատուները խոստացել են կառուցապատման ժամանակ ծառեր չհատել:
Ոսկան ՍԱՐԳՍՅԱՆ
