Նոյեմբերյանի ավագանու հոկտեմբերի 22-ի նիստում քաղաքի թիվ 2 մանկապարտեզի տնօրեն, 2001թ. Հայաստանի լավագույն դաստիարակ ճանաչված Փառանձեմ Խանգելդյանն ասաց, որ 2005թվականին ընդունված «Նախադպրոցական կրթության մասին» օրենքի 30-րդ հոդվածով սահմանված է, որ մանկապարտեզի դաստիարակի աշխատավարձը ցածր չպետք է լինի Հայաստանում ընդունված նվազագույն աշխատավարձի կրկնակիից: Նոյեմբերյանի մանկապարտեզներում դաստիարակները հանրապետությունում ընդունված նվազագույն աշխատավարձի չափով են աշխատավարձ ստանում, այն 2013թվականից կդառնա 35000 դրամ:
« Եթե որոշել ենք օրենքները կատարել, բերեք կատարենք նաեւ «Նախադպրոցական կրթության մասին» օրենքի այդ պահանջը: Մենք այսքան տարի դիմանում ենք»,-ասաց Փառանձեմ Խանգելդյանը: Նա ավագանու անդամներին եւ քաղաքապետին հորդորեց մանկապարտեզի դաստիարակների աշխատավարձի չափ սահմանելիս առաջնորդվել օրենքի պահանջով: Ավագանու անդամներն ասացին, որ տեղական բյուջեի հնարավորությունները սուղ են:
Ոսկան ՍԱՐԳՍՅԱՆ
