Հոկտեմբերի 26-ին Երեւանի պետական կամերային երաժշտական թատրոնում յոթերորդ անգամ բեմ բարձրացավ «Կրքոտ հաշվետվություն» ներկայացումը: Այս անգամ այն անցկացվում էր Հայաստանի երիտասարդական հիմնադրամի աջակցությամբ: Վերջինիս գործադիր-տնօրեն Ալեքսանդր Տեր-Հովակիմյանը ասում է, որ սա առաջին դեպքը չէ, երբ իրենց կառույցը հանդես է գալիս նման մշակութային ծրագրով: Դա իրենց որդեգրած քաղաքականության ուղղություններից է: Նման ձեւով ցանկանում են երիտասարդներին սովորեցնել լավագույնը, որպեսզի նրանց մոտ որոշակի ճաշակ ձեւավորվի մշակութային տարբեր արժեքների նկատմամբ:
Տեր-Հովակիմյանը նկատել է` վերջին շրջանում մոդայիկ է դարձել, որ ամեն ինչ քաղաքականացվում է: Նա հավաստիացնում է, որ աշխատում են հնարավորինս հեռու մնալ այդ ամենից, իրենք քաղաքական կառույց չեն եւ չեն հետապնդում որեւէ քաղաքական ուժի:
Թատերագետ Էդգար Հայրապետյանը մեզ հետ զրույցում ասաց, որ ներկայացումը հասցեագրված է երիտասարդությանը: Սյուժեի հիմքում ընկած էր տղամարդ- կին հարաբերությունը` դավաճանություն, վեճեր, որոնք ավարտվում են երկու սեռերի միացումով:
Ինչպես նախորդ վեց ներկայացումներից հետո, այս անգամ եւս անցկացվեց բաց քննարկում: Այդ ժամանակ հանդիսատեսը տվեց իրեն հուզող հարցերը: Սակայն «Առավոտ»-ը նկատեց, որ նրանք պասիվ էին: Հայրապետյանը հավաստիացրեց, որ նախորդ ներկայացումների ժամանակ հանդիսատեսը ակտիվ է եղել:
Կարդացեք նաև
Երեւանի պետական բժշկական համալսարանի ուսանող Էմիլ Ավետիսյանը, խոսելով ներկայացումից ստացած իր տպավորությունների մասին, ասաց, որ այն այլընտրանքային ներկայացում էր: Կերպարների մեջ որոշակի արհեստականություն էր նկատել, սակայն կարծում է, որ «Կրքոտ հաշվետվություն»-ը մեր օրերին է նման: Նա դժվարանում է ասել, թե ինչը կփոխեր ներկայացման մեջ, եթե ինքը լիներ բեմադրիչը, բայց որպես հանդիսապես հավանում է այն:
Արամ ԱՐԱՐԱՏՅԱՆ
