Ազատազրկման դատապարտված ՀԱԿ ակտիվիստ Տիգրան Առաքելյանին ազատ արձակելու եւ մյուս երեք ակտիվիստներին արդարացնելու պահանջով «Հայաստանն առանց քաղբանտարկյալների» նախաձեռնությունը նոյեմբերի 2-ին Վերաքննիչ քրեական դատարանի առջեւ բողոքի ակցիա կկազմակերպի: Այսօր այս մասին դատախազության շենքի առջեւ հերթական ակցիայի ժամանակ ՀԱԿ համախոհներին տեղեկացրեց ՀԱԿ ակտիվիստ Արեգ Գեւորգյանը: Նրա խոսքերով, նորաստեղծ նախաձեռնությունը առաջիկայում փողոցային ակտիվ պայքար է սկսելու. «Մենք պետք է պայքարենք քաղաքական բանտարկյալ հասկացության իսպառ վերացման համար: Պահանջում ենք Հայաստանում քաղբանտարկյալներին անհապաղ ազատ արձակել»:
Ցուցարարներն այս անգամ էլ վանկարկեցին «Ա-զա-տութ-յուն», «Դատ-վե-լու եք, կախ-վելու եք հետը»:
Ավելի ուշ ակցիայի մասնակիցները վանկարկեցին «Փիլո դատվելու ես», երբ դատախազության շենքի հարակից սրճարանում նկատեցին «մարտի 1-ի» գործով դատախազ Կորյուն Փիլոյանին, որը դեպի դատախազության շենք էր գնում:
«Փիլո նրանց կազատենք, դու կնստես»,- հավելեց ցուցարարներից մեկը. «Հանիրավի դատապարտել են այդ երիտասարդներին, այնքան պետք է պայքարենք, մինչեւ հասնենք մեր նպատակին, նրանց ազատ արձակեն»:
Կարդացեք նաև
Հետո ցույց տալով ՀՀ նախագահի նկարով պաստառը հավելեց. «Բոլոր հանցագործություններից տեղյակ է այս երեխան»:
Արփինե ՍԻՄՈՆՅԱՆ
