Այսօր Հայաստանի Ամերիկյան համալսարանում մեկնարկեց «Լռեցնելու (եւ ձայն տալու) ռազմավարություններ» (ԼՁՏՌ) խորագրով երկօրյա գիտաժողովը, որի նպատակն է՝ ի մի բերել տարբեր երկրների արվեստագետների եւ գիտնականների` մի քանի տարի տեւած գեղարվեստական համագործակցությունը, ոչ պաշտոնական զրույցների եւ հանրային քննարկումների արդյունքում ձեւավորված եզրահանգումները:
Գիտաժողովի կազմակերպիչ Նիրի Մելքոնյանը հայտնեց, որ ԼՁՏՌ-ի անցկացման գաղափարը ծնվել է 2010թ-ին՝ Մանհեթթենում տարբեր երկրների արվեստագետների մասնակցությամբ կազմակերպված «Կույր ժամադրություններ» ցուցահանդեսից հետո. «Ցուցահանդեսում ներկայացրեցինք այն ամենը, ինչ մնացել է ժամանակին Օսմանյան կայսրության բազմազան աշխարհագրության մասը կազմող ժողովուրդներից եւ մշակույթներից: Այս գիտաժողովը փորձ է՝ ուսումնասիրելու վերակառուցումների տարբեր տիպի հետեւանքները ժամանակակից փորձառությունների շրջանակներում: ԼՁՏՌ-ն կենտրոնանում է գեղարվեստական պրակտիկայի, գրականության, իրավունքի եւ էթիկայի ոլորտներում առկա զուգահեռների հետազոտության վրա: Համաժողովը կանդրադառնա նաեւ խորհրդային վարչակարգին եւ սառը պատերազմին վերաբերող իրողություններին»: Մելքոնյանը հավելեց, որ հաջորդ տարի «Կույր ժամադրությունները» կկազմակերպվեն Ստամբուլում եւ Երեւանում:
Կազմակերպիչը նաեւ ասաց, որ գիտաժողովին մասնակցում են արվեստագետներ Հայաստանից, Իսրայելից, Թուքիայից, Գերմանիայից, ովքեր կխոսեն բռնության հանդեպ իրենց վերաբերմունքից եւ մոտեցումներից:
Փիլիսոփա Աշոտ Ոսկանյանը ներկայացնելու է զեկույց՝ Չարենցին որպես փիլիսոփա դիտարկելով: Իսկ մշակութաբան Հրաչ Բայադյանն ասաց, որ տարիներ շարունակ ուսումնասիրել է ինքնություն եւ ազգային գաղափարախոսություն հասկացությունները եւ դրանք վերլուծելու հարցերը. «Զեկուցման առաջնային խնդիրն է՝ ներկայացնել օրիենտալիզմի հարցերը Խորհրդային Ռուսաստանում»:
Գիտաժողովին մասնակցում է նաեւ միջազգային համբավ վայելող բենգալական հնդիկ հեղինակ Ամիթավ Գոշը, ով զեկուցելու է 1916-1918թթ Սիրիայի մահվան ճամբարներում հնդիկ եւ հայ գերիների միջեւ հարաբերությունների մասին:
Լուիզա ՍՈՒՔԻԱՍՅԱՆ
