Անցյալ տարի Հայաստան այցելած Grand Orient De France ֆրանկ-մասոնական օթյակի Մեծ Վարպետ Գի Արսիզեն ասուլիսում հայտարարել էր, թե մեր երկրում կա իրենց օթյակի 15-20 անդամ: Նաեւ ասել էր, որ այդ անդամները չեն բացահայտվում, որովհետեւ Հայաստանում դեռ օթյակ չկա: Արսիզեն հայտարարել էր, որ ինքը Հայաստան է եկել, որպեսզի այդ օթյակի ձեւավորման հնարավորությունները դիտարկվեն: Հրապարակումներ եղան նաեւ այն մասին, թե Հայաստանի գերագույն օթյակ (Grand Lodge of Armenia) անունը կրող Հայաստանի մասոնական կազմակերպության ստեղծման եւ ճանաչման համար անհրաժեշտ է եղել առնվազն երեք երկրի հավանություն: Եվ ըստ նույն աղբյուրի, Հայաստանում Գերագույն մասոնական օթյակ ունենալուն հավանություն են տվել ԱՄՆ-ի, Ռուսաստանի եւ Ֆրանսիայի մասոնական կազմակերպությունները: ԶԼՄ որոշ հրապարակումների համաձայն, Հայաստանի մասոնները նույնիսկ տարածք են ձեռք բերել Վահագնի թաղամասում եւ ցանկություն ունեն մասոնական տաճար կառուցել:
Վերջերս հայաստանյան մամուլում եւ սոցցանցերում կրկին թեժացել է մասոնության թեման. առաջիկայում մասոնների հայոց գերագույն օթյակում կամ Ազատ քարտաշների գերագույն օթյակում քննարկվելու է Հայաստանի 2013թ. նախագահական ընտրությունների հարցը եւ անգամ թեկնածուն է «գծագրվելու»: Հավաքի ազդեցիկ դեմքերի թվում շրջանառվում է ամերիկահայ իրավաբան Արմին Ջանյանի, Հայաստանի կինեմատոգրաֆիստների միավորման նախագահ, ռեժիսոր Ռուբեն Գեւորգյանցի եւ գյուղատնտեսության նախարարի նախկին տեղակալ Լևոն Ռուխկյանի անունները:
Aravot.am-ը Հայաստանի կինեմատոգրաֆիստների միավորման նախագահից հետաքրքրվեց՝ հատկապես ո՞ր դպրոցներին են հայ մասոնները համակարգիչներ տրամադրել ու նյութապես աջակցել, ինչպես ինքը նշել էր օրերս «Իրավունք- Հետաքննություն» թերթին տված հարցազրույցում:
Կարդացեք նաև
«Դա փակ տեղեկություն է, ոչինչ չեմ կարող ասել»,-ասաց պարոն Գեւորգյանցը, որը չի թաքցնում իր մասոն լինելը:
Մեր հաջորդ հարցին՝ մի՞թե ազգայնականությունն ու մասոնությունը համատեղելի են, չէ՞ որ ինքը ծայրահեղ ազգայնական է, կինոմիության նախագահը պատասխանեց. «Չկա նման բան, էդ ո՞ր թերթն է գրել…, էդ իրանց ա թվում, որ համատեղելի չեն»:
Ավելի ուշ նա կրկին նշեց, որ հայ մասոնները բարեգործություն են անում. «Ուսանողներին թոշակներ ենք տալիս…թոշակ չէ, վարձեր…տարբեր տարիներին տարբեր բաներ ենք արել, այս տարի 2-3 հոգու վարձ ենք վճարել»: Իսկ կինոյի հետ կապված որեւէ աջակցություն եղե՞լ է: «Մեր առաքելությունը ոչ մի կապ չունի կինոյի հետ»,- շտապեց հայտնել կինոմիության գլուխը:
Ձեզ ձեր ո՞ր հատկանիշների համար են ընդգրկել մասոնական օթյակում, ո՞րն է այն սկզբունքը, որին համապատասխանում եք ու դավանում: Aravot.am-ի այս հարցի առիթով էլ Ռուբեն Գեւորգյանցը նորից ասաց. «Դա փակ ինֆորմացիա է, բայց ինչ-որ պետք է, ինտերնետ կա՝ մտեք, կարդացեք, թե չէ՝ մամուլում շատ սուտ բաներ են գրում»:
Հիշեցնենք, որ 2008-ին «Առավոտին» տված հարցազրույցում Rotary International կազմակերպության անդամ Հովսեփ Սեֆերյանն էլ, չբացառելով ռոտարիական ցանցում մասոնների գոյության փաստը, նշել էր, թե, օրինակ, Եղեռնի 90-ամյա տարելիցի առիթով
Հայաստանի Ազգային օպերային թատրոնը «Գայանե» բալետով հյուրընկալվել էր Թուրքիայում եւ բոլոր ծախսերը հոգացել էին թուրք ռոտարիականները:
Գոհար ՀԱԿՈԲՅԱՆ
