ՀԱԿ համախոհների ու ակտիվիստների նախաձեռնությամբ ստեղծվել է «Հայաստանն առանց քաղբանտարկյալների» նախաձեռնությունը: ՀԱԿ ակտիվիստ Արեգ Գեւորգյանն այսօր «Ուրբաթ» ակումբում ասուլիսի ժամանակ ասաց, որ նոր շարժմանը միացել են ապագայով մտահոգ երիտասարդներ, որոնք մեկ նպատակ ունեն՝ ազատվել իշխող ռեժիմից: Նա վստահեցրեց, որ ՀԱԿ-ի կողմից քաղաքական ենթատեքստ չկա: «Մենք միավորվում ենք Հայաստանի Հանրապետության Սահմանադրությամբ ամրագրված ինքնիշխան, ժողովրդավարական, սոցիալական, իրավական պետության գաղափարի, դրանից բխող՝ Հայաստանն առանց քաղբանտարկյալների տեսլականի շուրջ: Խստորեն դատապարտում ենք իշխանությունը բռնի ուժով զավթած անձանց հակաիրավական գործողությունները, մասնավորապես Հայաստանի քաղաքացիների հիմնարար իրավունքների ոտնահարումն ու քաղաքական հալածանքները»,- հավելեց նախաձեռնության անդամ Եվա Թովմասյանը:
Aravot.am-ը Ա. Գեւորգյանին խնդրեց մեկնաբանել ՀՀԿ պատգամավոր Կարեն Ավագյանի տեսակետը, թե ազատազրկման դատապարտված ՀԱԿ ակտիվիստների հարցում քաղաքական ենթատեքստ չկա, պարզապես ՀԱԿ-ը սովոր է ամեն ինչին քաղաքական ենթատեքստ տալ. «Կարեն Ավագյանին ու քաղաքական գործիչ իրենց կոչողների մեկնաբանությունները հանդիսանում են Հայաստանում գործող հանցագործների թիմի պաշտպանություն: Կարեն Ավագյանի դիտարկումը քաղաքական հայտարարություն դիտարկելը սխալ է ու նմանատիպ հայտարարությունները մեկնաբանման ենթակա չեն» :
Ա. Գեւորգյանի խոսքերով, իրենք կքննարկեն նաեւ Օսկանյանի գործը. «Որեւէ գործողություն ՝ կապված Վարդան Օսկանյանի կամ այլ քաղաքական ուժի ներկայացուցիչների հետ, կսկսեն քննարկել, երբ այդ մարդիկ լինեն բանտարկյալ ու կհրապարակվի նրանց վերաբերյալ քաղաքական դատավճիռ, ինչը հրապարակվել է Կոնգրեսի 4 ակտիվիստների նկատմամբ: Այն , որ Օսկանյանի նկատմամբ այսօր իրականացվում է քաղաքական հետապնդում, միանշանակ է, բայց նրա իրավունքների պաշտպանության հարցը կքննարկվի, եթե նա լինի բանտարկյալ»:
Կարդացեք նաև
Արփինե ՍԻՄՈՆՅԱՆ
