«21-րդ դարի տնտեսության զարգացմանը զուգահեռ գիտությունը կրկնակի վճռորոշ ու կարեւոր պայման է: Մենք ծածկել ենք գիտական գործունեության համար անհրաժեշտ բոլոր գործունեւության տեսակները՝ սկսած հետազոտական շնորհներից, սարքավորումների ձեռքբերում, արդիականացում, երիտասարդ գիտաշխատողների ինտեգրում: Քայլեր են ձեռնարկվում Հայաստանի գիտական համակարգն ինտեգրելու միջազգային հանրության մեջ»,-այսօր լրագրողների հետ հանդիպման ժամանակ նշեց Գիտության եւ առաջատար տեխնոլոգիաների ազգային հիմնադրամի՝ ԳԱՏԱՀ-ի տնօրեն Հարություն Կարապետյանը:
Նրա խոսքով վերջին ստացված ծրագիրը հայ վիրտուալ գրադարանի ծրագիրն էր, որը իրականացվել է: Այն ենթակառուցվածքային բնույթի դասական վարկանիշային, տեղեկատվական շտեմարան էր.
«Այսօր 15 տարիներից ստացված արդյունքները ամենալավ ցուցանիշն են, մենք ցույց ենք տալիս, թե ինչպես կարելի է քիչ գումարներով արդյունավետ աշխատանք կատարել: Սակայն ճիշտ քաղաքականությամբ չենք գնում: Եթե չասենք, որ բազային ֆինանսավորումը ամբողջովին կոռուպցիա է, ապա գոնե պարունակում է հսկայական կոռուպցիոն ռիսկեր: Տրամադրվող գումարները քիչ չեն՝ տարեկան 25 միլիոնը պետական բյուջեում գիտության համար լավ է: Գիտության ու տնտեսության խզվածքը բարդ երեւույթ է, Հայաստանի գիտությունը տնտեսությունից առաջ է, մեզ մոտ մրցունակ գիտություններից օրինակ ֆիզիկան տնտեսությունից առաջ է»:
ԳԱՏԱՀ-ի 15-ամյա գործունեության ամփոփ տվյալներ
«Համատեղ հետազոտությունների» ծրագրերի շրջանակներում իրականացվել են 57 հայ-ամերիկյան երկկողմանի հետազոտական նախագծեր, հատկացվել է մոտ 1,7 մլն. ԱՄՆ դոլար:
«Երիտասարդ գիտաշխատողների հետազոտությունների աջակցության» ծրագրերի շրջանակներում հատկացվել են 45 հետազոտական շնորհներ, հատկացվել է մոտ 300 հազ. ԱՄՆ դոլար:
«Աջակցություն համալսարանական հետազոտություններին» ծրագրերի շրջանակներում ստեղծվել են 4 հետազոտական կենտրոններ, հատկացվել է մոտ 600 հազ. ԱՄՆ դոլար:
«Գիտական ենթակառույցի զարգացման» ծրագերի շրջանակներում ստեղծվել է վերգերատեսչական օպտիկա-մալուխային «Գիտական ցանցը», ինչպես նաեւ հատկացվել են 12 սարքավորումների ձեռքբերման դրամաշնորհներ, հատկացվել է մոտ 1 մլն. ԱՄՆ դոլար:
«Գիտաժողովների մասնակցության աջակցություն» ծրագրերի շրջանակներում հատկացվել են ավելի քան 130 կարճատեւ գործուղումների դրամաշնորհներ, հատկացվել է մոտ 250 հազ. ԱՄՆ դոլար:
«Ամերիկյան լաբորատորիաներում հայ երիտասարդների գիտաշխատողների հետազոտությունների եւ Հայաստանում դրանց շարունակության աջակցություն» ծրագրերի շրջանակներում հատկացվել են 17 երկարատեւ գործուղումների դրամաշնորհներ, հատկացվել է մոտ 250 հազ. ԱՄՆ դոլար:
«Հայաստանում միջազգային գիտաժողովների աջակցության» ծրագրերի շրջանակներում աջակցություններ են հատկացվել 34 գիտաժողովների, հատկացվել է մոտ 110 հազ. ԱՄՆ դոլար:
«Սեմինարների եւ դասընթացների կազմակերպման» ծրագրերի շրջանակներում կազմակերպվել են 37 սեմինարներ, որոնց մասնակցել են ավելի քան 1500 գիտաշխատողներ, հատկացվել է մոտ 100 հազ. ԱՄՆ դոլար:
«Գիտական արդյունքների առեւտրայնացման» ծրագրի շրջանակներում աջակցություններ են հատկացվել շուկայի տեսակետից արժեքավոր 16 գիտական արդյունքերի հետագա զարգացմանը, հատկացվել է մոտ 50 հազ. ԱՄՆ դոլար:
Անժելա ՇԱՀՈՒՄՅԱՆ
