«Պարտադիր զինծառայություն չանցած զինապարտների տարկետման ժամկետը երկարացնելու մասին» օրինագծի քննարկման ժամանակ սփյուռքի նախարար Հրանուշ Հակոբյանը ներկայացրեց դրա կարեւորությունը: Դրանով զինծառայություն չանցած քաղաքացիները, որոնք ՀՀ-ում չեն, հնարավորություն կունենան ազատվել քրեական հետապնդումից, գան Հայաստան, մուծեն համապատասխան գումարներ եւ ազատվեն այդ հետապնդումից. «ՊՆ-ում հատուկ հաշիվ կա բացած, որի մեջ 6 մլրդ 30 մլն դրամ է մտել: 728 հոգի է անցյալ տարի օրենքից օգտվել, մոտ 1 մլրդ դրամ է մտել: Այս տարի մոտ 1000 հոգի կարող են այդ հնարավորությունից օգտվել եւ մոտ կես մլրդ դրամ փող մուծեն: Սա հնարավորություն է ստեղծում, որ կանխվեն քրեական հետապնդումները»:
«Ժառանգության» պատգամավոր Զարուհի Փոստանջյանը դժգոհեց. «Չնայած կառավարությունն եք ներկայացնում, պետք է ասեմ՝ ի՞նչ կապ ունի սփյուռքի նախարարությունը այն հայրենակիցների հետ, ովքեր գնում են Հայաստանից, խուսափում են պարտադիր զինծառայությունից: Ինչքա՞ն է շարունակվելու նույնատիպ երկարաձգումները այս օրենքի: Ե՞րբ են լինելու այն բարեփոխումները, որ մարդիկ ստիպված չլինեն աշխատելու, սովորելու համար գնան երկրից եւ գան այստեղ՝ գումարներ մուծեն: Ե՞րբ ենք վերջ տալու այս ժամանակավոր միջոցառումներին, որոնք բացարձակ որեւէ լավ բանի չեն բերում: Ճիշտ է, քաղաքացիները պետք է հնարավորություն ունենան գան հայրենիք, բայց եթե այդքան ուզում եք սփյուռքի հարցերով զբաղվել, պետք է այդ հարցերը լուծեք»:
Հրանուշ Հակոբյանն էլ պատասխանեց, որ, միեւնույն է, 27 տարեկանը լրանալուց հետո նրանք չեն ծառայելու եւ պետք է խիստ հումանիստական մոտեցում ցուցաբերել, քանի որ ոչ մեկս չենք ուզի, որ նրանք գան ու գնան բանտ. «Ինչ վերաբերում է նրան, որ լքում են Հայաստանը սովորելու համար, ես կարծում եմ՝ պետք է խրախուսենք: Հայաստանից դուրս կրթություն ստանալը կարող է միայն օգտակար լինել երկրի զարգացման համար»:
Կարդացեք նաև
Հռիփսիմե ՋԵԲԵՋՅԱՆ
