Պետբյուջեով 5 տարի առաջ սկսվել էին Կապանի թիվ 3 կրթահամալիրի հիմնանորոգման աշխատանքները, բայց դրանք կիսատ մնացին, եւ կրթահամալիրի 1.5 հարկը մնաց չհիմնանորոգված: Այս տարի ամառվանից «Քրոնիմետ» բարեգործական հիմնադրամի ֆինանսավորմամբ մեկնարկեցին երկրորդ հարկի մյուս կեսի հիմնանորոգման աշխատանքները, որն այս ամիս արդեն ավարտին է հասցվել եւ պաշտոնական բացումն արվել: «Կապանում այսքան տարի չի եղել մի բարեգործ, որ ցանկանա հիմնովին օգտակար լինել եւ այդ բարեգործության մեջ, բացի այս երեխաներին օգուտ տալուց, ոչ մի շահ չունենա: Իսկ «Քրոնիմետ» բարեգործական հիմնադրամը բարելավեց մեր կրթահամալիրի պայմանները», -ասաց Կապանի թիվ 3 կրթահամալիրի տնօրեն Ռիտա Դավթյանը:
«Քրոնիմետ» բարեգործական հիմնադրամի տնօրեն Աննա Սեդրակյանի խոսքով` 26 մլն դրամ գումար է ծախսվել այդ աշխատանքների համար, ներկա դրությամբ ընթացքի մեջ են նաեւ առաջին հարկի վերանորոգման աշխատանքները, որոնք նախատեսվում են ավարտին հասցնել մինչեւ տարեվերջ: Առաջին հարկի նորոգման համար նախատեսված բյուջեն կազմում է 47 մլն դրամ:
«Ընդհանուր առմամբ` մոտ 95 մլն դրամի ներդրում ենք արել այս կրթահամալիրում, ոչ միայն նորոգման աշխատանքներ ենք իրականացրել, այլեւ` դասասենյակների հին գույքը փոխարինել ենք բոլորովին նոր գույքով: Մեր համագործակցությունը կրթահամալիրի հետ շարունակական է լինելու, այժմ քննարկում ենք նոր թեմաներ` հետագա համագործակցության համար: Կլինի օժանդակություն հագուստի եւ այլ հարցերում, եւ որ ամենակարեւորն է` մտածում ենք երեխաներին ինտեգրել հասարակական կյանքում` մասնագիտացում տալու, ուսման ծախսը վճարելու եւ այլ տարբերակներ ենք մշակում, որպեսզի իրենք հետագայում կարողանան կերտել իրենց ապագան», – նշեց «Քրոնիմետ» բարեգործական հիմնադրամի տնօրեն Աննա Սեդրակյանը:
Կապանի թիվ 3 կրթահամալիրի տնօրեն Ռիտա Դավթյանի խոսքով` դպրոցում 250 երեխա է սովորում, որից 142-ը հատուկ կարիքավոր է, 50 երեխա էլ գիշերում է կրթահամալիրում: Կրթահամալիրի միակ խնդիրն այժմ համարում է հատուկ կարիքավոր երեխաներին հասարակության մեջ ներգրավման հարցը:
Մերի ՍՈՂՈՄՈՆՅԱՆ
