Երեւանի Թատրոնի եւ կինոյի պետական ինստիտուտի եւ «Հայ արտ սինեմա»-ի հայտարարած «Կինոռեժիսուրայի բարձրագույն կուրսերի» ընդունելությունն ավարտված է, եւ հայտնի են այն յոթ ուսանողների անունները, ովքեր անվճար հիմունքներով կմասնակցեն բարձրագույն կուրսերին` անցնելով կինոաշխարհի այնպիսի ներկայացուցիչների վարպետության դասեր, ինչպիսիք են Էմիր Կուստուրիցան, Կիմ Կի Դուկը, Պեդրո Ալմադովարը, Լյուկ Բեսոնը, Վիմ Վենդերսը, Արտավազդ Փելեշյանը եւ այլք: Այս մասին այսօր` ԵԹԿՊԻ-ում տեղի ունեցած հանդիպման ժամանակ ասաց ԵԹԿՊԻ ռեկտոր, ՀՀ Արվեստի վաստակավոր գործիչ, պրոֆեսոր Արմեն Մազմանյանը:
Նա նշեց, որ երկար սպասված բարձրագույն կուրսերը դասավանդելու են այն վարպետները, որոնց մասնակցությամբ ֆիլմերն արդեն իսկ հարազատ են դարձել. «Կուրսերի տեւողությունն է մեկ տարի, որից հետո մասնակիցները կես տարի կաշխատեն դիպլոմային աշխատանքի վրա: Կարեւոր է այն հանգամանքը, որ ուսանողներից փող չենք վերցնելու, իսկ վարպետության դասեր անցկացնող մասնագետները կստանան, այսպես ասած, ինտելիգենտ հոնորար»:
Պարոն Մազմանյանը հավելեց, որ մրցույթը երեկ է ավարտվել. «Ստացել ենք շուրջ 40 հայտ, ասել է թե` մեկ տեղի համար 7 դիմում, ընտրել ենք 4 տղայի եւ 3 աղջկա»:
Կարդացեք նաև
Քննական հանձնաժողովի անդամները խոսեցին քննությունների ընթացքից:
Սցենարիստ եւ կինոռեժիսոր Իրակլի Կվիրիկաձեն ասաց, որ դիմորդները ներկայացրել են շուրջ հինգ րոպե տեւողությամբ ֆիլմ. «Մեր ժամանակներում դժվար, անգամ` անհնար էր ժապավենի վրա ֆիլմ նկարահանելը, իսկ հիմա յուրաքանչյուրը տեսախցիկ ունի: Երեւակայություն ունեցող եւ ստեղծագործ մարդը կարող է որոշակի սյուժե գրել եւ մեկ-երկու օրում դա նկարահանել: Ֆիլմերի հեղինակների հետ հեշտ էր շփվել եւ հասկանալ, թե ինչ նախասիրությունների տեր մարդիկ են: Նաեւ հետաքրքրվել ենք, թե որ ռեժիսորներին եւ ինչ երաժշտություն են նախընտրում: Ընդհանուր առմամբ` հիացած եմ դիմորդների մակարդակով, բայց ցավում եմ, որ մյուս տաղանդավոր մասնակիցները դուրս մնացին մրցույթից»:
Ուկրաինայի ժողովրդական արտիստ, կինոռեժիսոր, սցենարիստ, պրոդյուսեր Ռոման Բալայանը հայտնեց, որ դասավանդելու համար արտերկրից հրավիրել է փորձառու ռեժիսորների. «Կարելի է ասել, որ նրանց ավելի շատ եմ վստահել, քան ինձ, քանի որ առավել գոհ կլինեն արդյունքներից: Մրցույթն աչքի էր ընկնում պրոֆեսիոնալիզմով. յոթ հաղթողից հատկապես երեքը բավական օրիգինալ գտնվեցին եւ հետաքրքիր գաղափարներ ներկայացրեցին»:
ՌԴ ժողովրդական արտիստ, կինոռեժիսոր, սցենարիստ եւ պրոդյուսեր Սերգեյ Սոլովյովը ափսոսանք հայտնեց, որ քննական հանձնաժողովի անդամների ընտրության հնարավորությունները սահմանափակ էին. «Ինչպես ասում են` ռեժիսոր կարող է լինել յուրաքանչյուրը, ով չի ապացուցում իրականությունը: Մրցույթի առանձնահատկությունն այն էր, որ պետք էր ներկայացնել համաշխարհային կինոյի ստանդարտներին համապատասխան աշխատանք եւ գեղագիտական գիտելիքներ: Ինձ հատկապես ուրախացրեց դիմորդների պատրաստվածության մակարդակը, կարծում եմ` նրանցից յուրաքանչյուրին կարելի է անհատական մոտեցում ցուցաբերել»:
ՌԴ ժողովրդական արտիստ, դերասան, ռեժիսոր եւ դրամատուրգ Անդրեյ Սմիրնովի խոսքով. «Աղջիկ-մասնակիցները տղաներից պինդ էին եւ նրանց աշխատանքներում առավել ակնհայտ էր բարձր որակի մշակույթը: Հավանաբար, աղջիկներից երկուսը լիդերներ կլինեն»:
Լուիզա ՍՈՒՔԻԱՍՅԱՆ
