ՀՀ կառավարության 2-րդ մասնաշենքի վաճառքի հարցը քաղաքապետարանի հետ քննարկվել է դեռ 2 տարի առաջ: Այսօր խորհրդարանում լրագրողների հետ ճեպազրույցի ժամանակ հայտարարեց վարչապետ Տիգրան Սարգսյանը:
«Դեռեւս երկու տարի առաջ քննարկում ենք ունեցել քաղաքապետի հետ, թե ինչպիսի՞ն պետք է լինի մայրաքաղաքի կենտրոնը: Նպատակահարմար է ունենալ եւս մեկ բարձր կարգի հյուրանոց: Երեւանը զգում է լուրջ խնդիրներ, երբ միաժամանակ 2-3 միջազգային միջոցառում է անցկացվում, հյուրանոցներում լարվածություն է ստեղծվում: Իսկ լավագույն տեղը ներդրողների համար՝ հինգաստղանի հյորւանոցներն են մայրաքաղաքի կենտրոնում: Գտնվեց ներդրող՝ ի դեմս պարոն Էռնեկյանի, ով համաձայնեց մեր պետության համար շատ շահավետ առաջարկություն անել: Մի կողմից հնարավորություն է տալիս լուծել ԱԳՆ-ի շենքային պայմանների բարելավման խնդիրը, նաեւ արդարադատության նախարարության շենքի խնդիրն ենք լուծում: Գործարքը երկուստեք շահավետ էր, ճիշտ կլինի, որ հրապարակի վրա հայտնվի բարձրակարգ հյուրանոց, իսկ պարոն Էռնեկյանը հայտարարել է, որ կլինեն լուծումներ, որ կբավարարեն մեր քաղաքացիների մշակութային պահանջները»,- ասաց . Սարգսյանը:
Վարչապետն ասաց, որ այս հարցով ՀՀ Ազգային Ժողովում տեղի կունենան լսումներ, քանի որ այդպիսի հայտ են ստացվել խորհրդարանից:
Լրագրողներից մեկի դիտարկումը` եթե համանման շահավետ առաջարկ լինի կառավարության շենքն էլ կվաճառեք` մնաց անպատասխան:
Նելլի ԳՐԻԳՈՐՅԱՆ
