Գագիկ Ծառուկյանի մայրը` Ռոզա Ծառուկյանը Վարդենիսում կարտոֆիլի բերքահավաքի է մասնակցում: Այսօր «EXPO-RUSSIA ARMENIA 2012» հայ-ռուսական արդյունաբերական ցուցահանդեսի ժամանակ, «Մուլտի-ագրոյի» տաղավարի մոտ, երբ մի ռուս գործարար կին Գագիկ Ծառուկյանից հետաքրքրվեց, թե ինչու «Մուլտի ագրոյի» սեփականատեր Ռոզա Ծառուկյանը ներկա չէ ցուցահանդեսին, պարոն Ծառուկյանն ասաց` «Мама в Варденисе, картошку собирает»: Տաղավարի մոտ համտեսելով իր մորը պատկանող «Մուլտի ագրոյի» արտադրած պանիրը, պարոն Ծառուկյանը հպարտությամբ ասաց` «շատ համով է, ապրեք»:
«EXPO-RUSSIA ARMENIA 2012» հայ-ռուսական արդյունաբերական ցուցահանդեսը Հայաստանում արդեն հինգերորդ անգամ է անցկացվում. Կառավարության ընդունելությունների դահլիճում, այսօր հայկական, ռուսական եւ հայ-բելոռուսական մի քանի տասնյակ տաղավարներ կային:
ԱԺ նախագահ Հովիկ Աբրահամյանը, Հայաստանում Ռուսաստանի դեսպան Վյաչեսլավ Կովալենկոն եւ Գագիկ Ծառուկյանը շրջելով ծանոթանում էին ցուցանմուշներին, եւ որքան էլ փորձում էին ոչ մի տաղավար բաց չթողնել, այնուամենայնիվ մի քանի ցուցասրահ անտեսեցին, որոնց ներկայացուցիչները մի փոքր նեղվեցին:
Ռուսաստանցի գործարարները հայ բարձրաստիճան պաշտոնյաների ուշադրությունից դուրս մնալն Aravot.am-ի հետ զրույցում բացատրեցին թիկնապահների աշխատանքով. «Դե երեւի չնկատեցին, որովհետեւ թիկնապահներն այնպես էին փակել ճանապարհը, որ մեզ չնկատեցին»:
Կարդացեք նաև
Կոսմետիկայից, ոգելից խմիչքներից ու քաղցրավենիքից մինչեւ «ուղղաթիռային» ծառայություններ են ներկայացված ցուցահանդեսում:
Մեզ հետ զրույցում ռուսաստանյան բիզնեսի ներկայացուցիչները վստահեցրին, որ ամենայն լրջությամբ հետաքրքրված են Հայաստանում էլ իրենց գործը դնելու: Մեր այն հարցին` արդյոք ձեռնտու է հայկական փոքր շուկայում գործ ծավալել, ռուս բիզնեսմեններն ասացին, որ նախապես ամեն ինչ հաշվարկված է եւ պայմանավորված, եկել են նոր գործարար կապեր հաստատելու եւ շուկան ընդլայնելու համար:
Ռուսական «ПАНХ» ընկերության մատուցած ծառայությունն իսկապես նորություն է Հայաստանում: Ընկերության ներկայացուցչի խոսքերով` իրենք ուղղաթիռային ծառայություններ են մատուցում այն ընկերությունների համար, որոնք օրինակ շինարարություն են կատարում եւ մարդու կամ մեքենայի համար դժվարամատչելի ճանապարհ է կամ տեղանք, եւ միայն ուղղաթիռի միջոցով հնարավոր է աշխատանք կատարել. «Մենք հետաքրքրվել ենք եւ պարզել, որ Հայաստանում նման ծառայություն չկա, ուստի ակնկալում ենք, որ կգտնվեն ընկերություններ, որոնք մեր կարիքը ունեն»:
«Ուրարտու ագրոհոլդինգն էլ», ինչպես ընկերության հայաստանյան ներկայացուցիչն ասաց, արդեն 5 ամիս է Հայաստանում աշխատում են եւ գյուղացիական տնտեսությունների համար տարբեր աշխատանքներ են մատուցում. «Կարող են նաեւ ընդամենը 50 դոլարով ջերմոց պատրաստել, կամ ջրագծեր քաշել, տրամադրել ցանցեր, որոնք բերքն ու այգին պաշտպանում են կարկուտից»:
Նելլի ԲԱԲԱՅԱՆ
