Ազգային ժողովում կառավարության հետ հարցուպատասխանի ժամանակ ԲՀԿ-ական պատգամավոր Էլինար Վարդանյանը ՀՀ վարչապետ Տիգրան Սարգսյանից հետաքրքրվեց, թե ինչո՞ւ է ՀՀ ԱԳ նախարարը մեկնում գործուղումների այնպիսի էկզոտիկ երկրներ, ինչպիսիք են Մեքսիկան, Գվատեմալան կամ Կոնգոն, որոնց ՀՀ քաղաքացիները ծանոթ են, լավագույն դեպքում՝ աշխարհագրության դասընթացներից: «Որքանո՞վ են այդ այցելությունները առանցքային ՀՀ արտաքին քաղաքականության համար, արդյոք նման այցերը կրճատելու միջոցով հնարավոր չէ՞ր լինի լուծել կարեւորագույն սոցիալական հարցեր, ասենք՝ նվազագույն աշխատավարձի շեմը նվազագույն սոցիալական զամբյուղին հասցնելը»,- հարցրեց ԲՀԿ-ական պատգամավորը:
ՀՀ վարչապետ Տիգրան Սարգսյանը հեգնանքով նկատեց, որ հարցադրումը քաղաքական բովանդակություն ունի եւ, ըստ էության, պատասխան չի ակնկալում: Նա ընդգծեց, որ իր կողմից կարող է ավելացնել ԲՀԿ-ական պատգամավորի նշած սոցիալական խնդիրների շարքը ու ասաց, որ նման մոտեցումն ընդունելի չէ, քանի որ հենց խորհրդարանի դահլիճում կառավարությանը բազմիցս մեղադրում են նաեւ արտաքին քաղաքական ոլորտում ոչ բավարար ակտիվության համար:
Վարչապետը ընդգծեց նաեւ, արտգործնախարարի բոլոր այցերը համաձայնեցվում են նախագահի հետ:
Կարդացեք նաև
Նելլի ԳՐԻԳՈՐՅԱՆ
