«Մենք մեր աշխատակիցներին լավություն ենք անում: Նրանց կրեդիտ ենք տվել: Բոլորը ընդհանուր տետրի մեջ են գրանցում պարտքացուցակը, իսկ մեր խանութի վարիչը ավելի ժամանակակից տեխնոլոգիայով քարտեր է տվել, որ աշխատողները այդ քարտով գնան, առանց գումարը վճարելու, առեւտուր անեն խանութից եւ ապրանք տանեն իրենց տուն: Աշխատավարձը ստանալուց հետո կտանեն կվճարեն»,- Aravot.am-ին պարզաբանեց «Էլիտ Շանթ» ընկերության հիմնադիր նախագահ Յուրա Ղարիբյանը՝ անդրադառնալով աշխատակիցներին տրամադրված կրեդիտ քարտերի շուրջ առաջացած աշխատակիցների դժգոհություններին: Հիշեցնենք, որ մեր տեղեկություններով, աշխատակիցներին կրեդիտ քարտերը պարտադրվել են եւ հրահանգվել էր 100.000 դրամի չափով աշխատավարձ ստացողներին ամսական 10.000 դրամի, իսկ 200.000 դրամ աշխատավարձ ստացողներին 20.000 դրամի չափով առետուր անել:
Պարոն Ղարիբյանը, հերքեց, թե պարտադրել են, ասաց ՝ ով չի ուզում, կարող է չօգտվել իրենց առաջարկից. «Չափ էինք դրել, որ 10.000 դրամի առեւտուր կարող եք անել, եթե մեկը կա, որ շատ է ուզում անել, թույլ ենք տալիս ավելի շատ անել: Հիմա այդ կրեդիտը, որը օգնություն է, լավություն է աշխատողներին, լավությո՞ւն է դառնում, թե՞ վատություն: Նրանց տվել ենք ապառիկ գնումներ կատարելու հնարավորություն՝ մինչեւ աշխատավարձ կունենան, կվճարեն: Բայց դա մենակ աշխատավարձ չէ, եթե իր աշխատավարձի չափով էլ անի գնում, պետք է տնից կամ եղբորից բերի վճարի»:
Մեր հարցին, թե կրեդիտ քարտերով ավելի շատ աշխատողների՞ն, թե՞ ձեր բիզնեսին է օգտակար լինում, պարոն Ղարիբյանն ասաց. «Եթե այդ մարդկանց օգնել ենք, նշանակում է նրանք էլ այդտեղից օգտվում են ՝փոխադարձ օգնելով մեզ : Նորմալ երեւույթ է, ամբողջ աշխարհում գործում է, ես չեմ հնարել, որ մի քանի հոգի էլ իրենց վատ են զգացել»:
Կարդացեք նաև
Արփինե ՍԻՄՈՆՅԱՆ
