«Ժառանգություն» խմբակցության պատգամավոր Զարուհի Փոստանջյանը այսօր խորհրդարանում կառավարության հետ հարցուպատասխանի ժամանակ հետաքրքրվեց Տավուշի մարզում կառուցվելիք նոր ՀԷԿ-ի ճակատագրով եւ արդյո՞ք փոխհատուցվել են արդեն գործող ՀԷԿ-ի հասցրած բնապահպանական վնասները:
Հիշեցնենք, որ վերջերս Տավուշի մարզի Գետահովիտ եւ Ենոքավան բնակավայրերի բնակիչները բողոքի ակցիաներ էին անցկացնում արդեն իսկ գործող եւ նոր կառուցվելիք ՀԷԿ-երի հետ կապված:
ՀՀ բնապահպանության նախարար Արամ Հարությունյանն ի պատասխան ասաց, որ «Խաչաղբյուր-1» ՀԷԿ-ի հասցրած վնասների առիթով ուսումնասիրություններ չեն իրականացրել, իսկ նոր կառուցվելիք «Խաչաղբյուր-2»-ի վերաբերյալ աշխատանքային խումբը դեռեւս աշխատում է եւ վերջնական որոշում կձեւավորվի միայն բոլոր շահագրգիռ կողմերի կարծիքները հաշվի առնելով:
Կարդացեք նաև
Նախարարը նշեց, որ ՀԷԿ-ի կառուցման գործընթացում նախագծային շեղում կա, ինչը վրդովեցրեց Զարուհի Փոստանջյանին, որը նկատեց, թե նմանատիպ շեղումների արդեն իսկ քանիցս ականատես ենք եղել: Ի դեպ, դրանց վերաբերյալ միջազգային կոնվենցիաների խախտումների արձանագրումներ կան: «Դուք գիտեք, թե ընթացակարգերն ինչպես են խախտվում»,- շպրտեց Զարուհի Փոստանջյանը:
Նելլի ԳՐԻԳՈՐՅԱՆ
