Ռուսաստանի եւ Թուրքիայի արտգործնախարարների հանդիպումը Մոսկվայում, 25-ը հունվարի, 2012թ.
Սիրիական ճգնաժամը շարունակում է խորացնել պաշտոնական Մոսկվայի եւ Անկարայի հարաբերություններում առկա առանց այդ էլ լուրջ տարաձայնությունները:
Դրանց հիմնական պատճառը կրկին Մոսկվա – Դամասկոս չվերթի հետ հոկտեմբերի 10-ին տեղի ունեցած միջադեպն է, երբ թուրքական իշխանությունները ստիպեցին «Սիրիական ավիաուղիներ»-ին պատկանող A-320 օդանավին վայրէջք կատարել Անկարայի «Էսենբողա» օդանավակայանում` հատուկ զննման նպատակով:
Երեքշաբթի օրը Թուրքիայի արտաքին գործերի նախարար Ահմեթ Դավութօղուն մեկ անգամ եւս անդրադարձավ միջադեպին` BUGUN հեռուստաընկերությանը տված հարցազրույցում վերահաստատելով նախկինում հնչեցված այն հայտարարությունը, թե թուրք իրավապահները բացառապես ռազմական բեռներ են առգրավել:
«Ռազմական նշանակության սարքավորումները սկզբում բեռնվում են քաղաքացիական օդանավի մեջ, ապա դրանք փորձում են տեղափոխել Սիրիա մեր օդային տարածքով` հույս ունենալով, թե դա թուրքական կողմի համար աննկատ կանցնի, եւ որ մեզ հնարավոր է խաբել», – նշել է Դավութօղուն:
Կարդացեք նաև
Hurriyet-ի մեկնաբանը պնդում է, որ Դավութօղլուի այս կտրուկ հայտարարությունը պատասխան էր Ռուսաստանի արտաքին գործերի նախարար Սերգեյ Լավրովին, որը մի քանի օր առաջ ասել էր. – «Դա օրինական բեռ էր` օրինական հիմունքներով տեղափոխվող: Թուրքերը, իմ պատկերացմամբ, իրենց քայլը պատճառաբանում էին Չիկագոյի կոնվենցիայի դրույթներով, եւ նրանք դրա իրավունքն ունեին: Այժմ, սակայն, փոխադրվող բեռի սեփականատերը ցանկանում է այն հետ ստանալ: Բացի այդ, Մոսկվան ցանկանում է լսել թուրքական կողմի գնահատականը տեղի ունեցածին` եւ որքան հնարավոր է շուտ»:
Ահմեթ Դավութօղլուն, սակայն, երեկվա իր հարցազրույցում թափանցիկ կերպով ակնարկեց, որ A-320-ով տեղափոխվող բեռը սեփականատերը հազիվ թե երբեւիցե տեսնի:
«Մենք առգրավված այդ բեռների հետ կանենք այն, ինչ ճիշտ ենք համարում, եւ այն, ինչ պահանջում են միջազգային կանոնները: Դրանից հետո մենք ամեն ինչ կբացատրենք մեր բարեկամներին», – հայտարարեց Թուրքիայի արտգործնախարարը:
Գեւորգ Ստամբոլցյան
«Ազատություն» ռադիոկայան
