Վերջերս կայացած Եվրոպական ժողովրդական կուսակցության համագումարում ՀՀ նախագահ Սերժ Սարգսյանը, վկայակոչելով մայիսին տեղի ունեցած խորհրդարանական ընտրությունների վերաբերյալ ԵԱՀԿ/ԺՄԻԳ-ի դիտորդական առաքելության եզրակացությունը, խոստացավ, որ 2013թ. նախագահական ընտրությունները եւս ազատ եւ արդար մրցակցային սկզբունքով են լինելու:
Հայաստանում իր առաքելությունն ավարտող ՄԱԿ-ի մշտական համակարգող Դաֆինա Գերչեւայից Aravot.am-ը հետաքրքրվեց՝ իր համար արժանահավա՞տ էին նախագահի խոստումները ազատ եւ արդար ընտրություններ անցկացնելու վերաբերյալ, եթե նկատի ունենանք 2008թ. նախագահական ընտրություններին հաջորդած քաղաքական ձերբակալումները եւ այդ առիթով եվրոպական մի շարք կառույցների չկատարված բանաձեւերը: «Այո, ներշնչում են»,- ասաց տիկին Գերչեւան, հավելելով. «Կարծում եմ, այդ խոստումները կկատարվեն: Ազատ եւ արդար ընտրությունների ֆունկցիայի հանձնառությունը կպահպանվի: Դա շատ կարեւոր է ոչ միայն երկրի կայունության, այլ Եվրոպական միության հետ առավել սերտ համագործակցություն ունենալու, ԵՄ-ի հետ գործընկերությունից երկրի համար առավել օգուտներ քաղելու համար»:
Նելլի ԳՐԻԳՈՐՅԱՆ
