Թուրքիայի կրթության միությունը հայտնել է, որ պետք է հեռացնել անցած ամիս Ստամբուլի մի քանի դպրոցներում բաժանված գրքերը, որոնք ծաղրում են ոչ մահմեդական պատմական գործիչներին՝ գրքերի խմբագրին մեղադրելով ատելության քարոզ անելու մեջ: Հայտնում է «Էյ Էֆ Փի» լրատվական գործակալությունը:
«Գրքերում առկա են ոչ գիտական, հակասեմիտ, հակահայկական, քրիստոնեությունը, ոչ կրոնական մարդկանց և ձախականներին ստորացնող արտահայտություններ», – նշվում է Էգիթիմ-Սեն միության երկուշաբթի օրն արած հայտարարությունում:
«Մեծ քայլեր կենսագրական շարքերում» կոչվող գրքերում, որոնք անվճար բաժանվել են Ստամբուլի Մալթեփ շրջանի տարրական դպրոցի երեխաներին, Ալբերտ Էյնշտեյնը նկարագրված է որպես «կեղտոտ ու փնթի» երեխա, որը ոտաբոբիկ է քայլում ու օճառ է ուտում, «չնայած տխուր հանգամանքին, որ այդ տարիներին Գեստապոն հրեաներին վառարաններն էր մտցնում ու օճառ սարքում նրանցից»: Չարլզ Դարվինը նկարագրված է որպես «փողոցային հրեա, որն ատում էր իր մեծ քիթը», որը 20 տարի է վատնել իր էվոլյուցիայի տեսությունն ապացուցելու համար, «գիտակցելով, որ ինքն իրեն խաբում է»: Զիգմունդ Ֆրոյդը նկարագրված է որպես «այլասերվածների հայր», իսկ Սանտա Կլաուսը «տղա, որին պետք է դատեն տներ թալանելու համար»:
Գրքերի խմբագիր Ահմեդ Սըրա Արվասին, որը նաև Թուրքիայի երեխաների ամենահին հանդեսի՝ «Թուրքիյե Չոջուկ»-ի գլխավոր խմբագիրն է, «Ռադիկալ» թերթին ասել է. «Դրանք ուղիղ կենսագրություններ չեն… դրանք գիտական կամ ակադեմիական գրություններ չեն, ոչ էլ համալսարանային դիսերտացիա են»:
Կարդացեք նաև
Պատրաստեց Հովհաննես ԻՇԽԱՆՅԱՆԸ
