Շախմատի «Միկա» կանանց ակումբի այսօրվա մամուլի ասուլիսում Հայաստանի շախմատային ֆեդերացիայի գլխավոր քարտուղար Գագիկ Հովհաննիսյանը, խոսելով Էյլաթում անցկացված Եվրոպայի ակումբային առաջնությունում մեր շախմատիստուհիների անհատական ցուցանիշների մասին, ասաց. «Սա մեր աղջիկների ամենակայուն մրցելույթն էր միջազգային մրցաշարերում: Բոլորն էլ հավասար խաղ ցուցադրեցին: Էլինան 1-ին խաղատախտակի առջեւ ցույց տվեց 3-րդ արդյունքը` իրենից առաջ թողնելով միայն աշխարհի գործող չեմպիոն Հոու Յիֆանին եւ նախկին չեմպիոն Ալեքսանդրա Կոստենյուկին: Լիլիթը նույնպես հրաշալի հանդես եկավ` իր խաղատախտակի առջեւ ցույց տալով լավագույն արդյունքներից մեկը: Սակայն այս մրցաշարում գործում էին այնպիսի կանոններ, որոնցով անհատական մեդալ նվաճելու համար ավելի կարեւոր էին ոչ թե վաստակած միավորները, ինչի դեպքում Լիլիթ Մկրտչյանն անպայման մեդալ կստանար, այլ, այսպես կոչված, ընթացիկ վարկանիշայինի հանգամանքը: Ի դեպ, Լելա Ջավախիշվիլին, որը ցույց տվեց ամբողջ մրցաշարի լավագույն արդյունքը, նույնպես այդ կանոնի պատճառով պարգեւատրվեց միայն թիմային արծաթով: Այնպես որ, այդ կանոնադրությունում վիճելի կետեր կան»:
Աշոտ ՀԱԿՈԲՅԱՆ
