Հարցին, թե ճի՞շտ են արդյոք մամուլում շրջանառվող այն տեղեկությունները, թե Արմավիրի մարզի Արեւշատ գյուղի ջրագծերը ՀՀ վարչապետ Տիգրան Սարգսյանի եղբայրն է շահագործում եւ դրանք պետգույքի վարչությո՞ւնն է վաճառել, պետական գույքի կառավարման վարչության պետ Արման Սահակյանն ասաց. «Ես կուզեի խնդրել, որպեսզի մենք չարծարծենք վարչապետի անունը, քանի որ նա ընդհանրապես կապ չունի այս գործարքի հետ: Առաջարկությունը եղել է Սեւան-Հրազդան ջրային ընկերության կողմից, որը տարիներ շարունակ ունեցել է բավականին մեծ կուտակված պարտքեր: Այն խողովակաշարը, որի մասին խոսում եք, չի օգտագործվել եւ չի օգտագործվելու երբեւէ: Ստեղծվել է մրցութային հանձնաժողով, եղել է հայտ, հայտը քննարկվել է եւ մրցույթի համապատասխան կարգով հաղթող է ճանաչվել»: Պարոն Սահակյանի պարզաբանման շարունակությունը` տեսանյութում`
Խոսելով պետական գույքի մասնավորեցումից առաջացած գումարներից, վարչության պետն ասաց, որ պետբյուջե է մուտքագրվել մոտ 171 միլիոն դրամ եւ 49-ը միլիոն դրամ՝ համայնքային բյուջե: Մինչ այս, Մամուլի շենքից հավաքագրվող գումարները ամսական ընդամենը 250 հազար դրամ են կազմել, ինչն, ըստ Արման Սահակյանի, չնչին գումար է եղել, վարձավճարների բարձրացումից հետո պետգույքն ակնկալում է այդ գումարների 400-500% աճ:
Այսուհետ պետական գույքը վարձակալությամբ կտրամադրվի միայն աճուրդով եւ ժամավճարով, նախկին որոշման մեջ ժամավճարով հատկացնելու դրույթ չկար, վստահեցրեց պարոն Սահակյանը: Պետգույքի վարձակալության ոլորտում տեղի ունեցած փոփոխություններից հետո ՊՈԱԿ-ները մինչեւ մեկ տարի ժամկետով կրկին կարող են են իրենց գույքը տալ վարձակալության, սակայն հանրակրթական դպրոցների մասով սահմանափակումներ կան: Նրանք իրավունք ունեն իրենց տարածքները միայն տրամադրել կրթական, մշակութային, ուսումնադաստիարակչական, սոցիալական ծրագրեր իրականացնելու համար:
Մասնավորեցման ծրագրից հանվելու է Ստեփանավանի օդանավակայանը, քանի որ, Արման Սահակյանի կարծիքով, այն մեր հանրապետության համար ռազմավարական նշանակություն ունի: Նոր փոփոխություններով նաեւ մասնավորեցման պայմանագրերով նոր պարտավորություններ են սահմանվել, ըստ որոնց սեփականատերը պետք է հստակ ժամկետներում կատարի ստանձնած պարտավորությունները, հակառակ դեպքում՝ Դվին, Սեւան, Շիրակ հյուրանոցների նման կունենաք անավարտ շինություններ, իսկ սեփականատերերն էլ չեն կատարի խոստացված ներդրումները:
Կարդացեք նաև
Լուսինե ԲՈՒԴԱՂՅԱՆ
