Ռուսաստանի Պետական դուման երեկ ընդունել է օրենք, ըստ որի՝ Ռուսաստանի տարածքում աշխատելու թույլտվություն ստանալու կամ աշխատելու թույլտվության ժամկետը երկարաձգելու համար անհրաժեշտ է ռուսաց լեզվի իմացության քննություն հանձնել։ Ռուսաց լեզվի բազային իմացությունը պետք է հաստատվի փաստաթղթով, որը տրվելու է քննությունը հանձնելուց հետո։ Օրենքը վերաբերում է բնակարանաշինության, առեւտրի եւ կենցաղային սպասարկման ոլորտում աշխատող միգրանտներին։ Հենց այդ ոլորտներում էլ աշխատում է ԱՊՀ երկրներից, այդ թվում՝ Հայաստանից Ռուսաստան մեկնած միգրանտների ճնշող մեծամասնությունը։ Քննությունից կարող են խուսափել նախկին ԽՍՀՄ քաղաքացի հանդիսացած այն անձինք, որոնք կներկայացնեն մինչեւ 1991 թվականի սեպտեմբերի 1-ը տրված պետական նմուշի դիպլոմ, որը կհաստատի բազային մակարդակով ռուսաց լեզվի իմացությունը։ Սույն օրենքը ուժի մեջ է մտնելու այս տարվա դեկտեմբերի 1-ից։ Քննությունները ընդունվելու են թեստային տարբերակով։ Ռուսաստանյան լրատվամիջոցների փոխանցմամբ, քննության հանձնման համար դիմումատուն վճարելու է 1000 ռուբլի՝ մոտ 13 հազար դրամ։
«Հայկական ժամանակ»
