Լոռու մարզպետարանի տվյալներով այս տարվա 9 ամիսների ընթացքում մարզում արձանագրված գայլերի հարձակման վնասի չափը 3 միլիոն 940 հազար դրամ է:
Թեեւ ամեն տարի գյուղացիական տնտեսությունները ենթարկվում են գայլերի հարձակման ու արդյունքում կրում վնասներ, այնուամենայնիվ, ՀՀ կառավարությունը չի շտապում գյուղացու կրած վնասների համար փոխհատուցում տրամադրել:
Լոռու մարզում այս տարի գրանցվել է գայլերի հարձակման երեք դեպք: Արդյունքում մարզի Ջրաշեն, Արջուտ եւ Լուսաղբյուր համայնքների բնակիչներն ընդհանուր առմամբ կորցրել են 55 գլուխ խոշոր եղջերավոր անասուն, ոչխարներ ու գառներ:
Լոռու մարզպետարանի գյուղատնտեսության եւ բնապահպանության վարչության գյուղատնտեսության բաժնի առաջատար մասնագետ Արմեն Գասպարյանը Aravot.am-ի հետ զրույցում ասում է, որ արձանագրված 55 կորուստը չի արտացոլում դրության իրական պատկերը:
Կարդացեք նաև
«Մարդիկ միշտ չէ, որ տեղեկացնում են մեզ գայլերի հարձակման դեպքերի մասին, համայնքապետերն էլ լռում են շատ հաճախ: Ուրիշ ճանապարհներով ենք տեղեկանում: Այդ իսկ պատճառով այդ թվերն էլ չեն արտացոլում իրական պատկերը: Իրականում ավելի շատ են»:
Նա կարծիք է հայտնում, որ դեպքերի մասին չտեղեկացնելու պատճառը նաեւ ֆինանսական փոխհատուցում չստանալն է:
«Պետությունը փոխհատուցում չի տրամադրում: Հավանաբար գիտեն, որ փոխհատուցում չեն ստանալու, այդ պատճառով էլ չեն տեղեկացնում»,-գայլերի հարձակման մասին համայնքների բնակիչների ու համայնքապետերի տեղեկատվություն տրամադրելու պասիվության պատճառների վերաբերյալ իր կարծիքն է հայտնում Արմեն Գասպարյանը:
Իրավիճակը շտկելու եւ գայլերի հարձակումների դեմ արդյունավետ պայքար մղելու համար էլ վերջերս Լոռու մարզպետ Արթուր Նալբանդյանի առաջարկությամբ շրջաբերական նամակներ են ուղարկվել մարզի համայնքներ` ցանկացողներին ներգրավելու որսորդմիության շարքերը:
«Այն մարդիկ, ովքեր կցանկանան եւ կհամապատասխանեն որսորդ լինելու չափանիշներին, նրանց կտրամադրվեն որսորդական զենքեր`ավելի մեծ մասշտաբներով պայքարելու համար գայլերի հարձակումների դեմ»,-տեղեկացնում է առաջատար մասնագետը:
Անուշ ԲՈՒԼՂԱԴԱՐՅԱՆ
