Խորհրդարանական հայտարարությունների ժամին ՀԱԿ պատգամավոր, նախկին զինդատախազ Գագիկ Ջհանգիրյանը խոսեց Մարդու իրավունքների եվրոպական դատարանում ընդդեմ Հայաստանի կայացվող վճիռների մասին: Նա նկատեց, որ ՄԻԵԴ-ում դեռ հազար գանգատ էլ սպասում է իր ճակատագրին, որոնցից մի ստվար հատվածը, ըստ Ջհանգիրյանի, քաղաքական պատվերի արդյունք է:
Գագիկ Ջհանգիրյանը ծանրանալով առավելապես «Մարտի 1»-ի գործերի վրա, ասաց, որ դրանք տխուր նախադեպ են ստեղծում՝ ազդելով Հայաստանի Հանրապետության միջազգային հեղինակության եւ վարկի վրա: Ապա վկայակոչելով ԵԽԽՎ-ի ընդունած բանաձեւը, ասաց, որ ներկայիս խորհրդարանը կիրառելով այդ բանաձեւի պահանջը, կարող է վերանայել նախկին գումարման խորհրդարանում իրենց գործընկերների՝ 4 պատգամավորների ճակատագիրը վճռող քվեարկությունը եւ քավել իր մեղքը: Հայտարարության համար հատկացված ժամանակը լրացավ եւ լրագրողների համար լսելի չեղավ, թե հետո պարոն Ջհանգիրյանը ինչ այլ կոչ արեց իր գործընկերներին:
Նելլի ԳՐԻԳՈՐՅԱՆ
