Նոյեմբերի 1-ին Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Արայիկ Մելքումյանը կհրապարակի Հմայակ Հովհաննիսյանի դեմ Սենիկ Ջուլհակյանի հայցով դատական ակտը:
Հայցվոր Ս.Ջուլհակյանը իրեն հասցված վիրավորանքի ու զրպարտության համար պահանջում է, որպեսզի Հմայակ Հովհաննիսյանը հրապարակային ներողություն խնդրի եւ զրպարտչական տեղեկությունները հերքի:
Այս գործով ինքնուրույն պահանջ չներկայացնող կողմ՝ պատասխանող էին ճանաչվել նաեւ մի շարք լրատվամիջոցներ, մասնավորապես, «Հրապարակը», «Մուլտի Մեդիա Թիվին», «Արմենիա» հեռուստաընկերությունը, «Հայելի» ակումբը, «lurer.com»-ը, «Հենարան» ակումբն ու «Դիալոգ» վերլուծական կենտրոնը:
Կարդացեք նաև
Սակայն ըստ Հմ. Հովհաննիսյանի ներկայացուցիչ, փաստաբան Լիաննա Գրիգորյանի, իրեն առանց ծանուցելու եւ իրենց բացակայությամբ ոչ միայն դատական նիստ է հրավիրվել, այլեւ դատավորը մտել է խորհրդակցական սենյակ:
Հիշեցնենք, որ հայցվորը վիճարկում էր Հմայակ Հովհաննիսյանի հետ լրատվամիջոցների հետ հանդիպման ժամանակ հնչած մի շարք վիրավորական արտահայտությունները:
Հմայակ Հովհաննիսյանը («Հմայակի գրասենյակը խլում են» 20.04.2012թ.) Սենիկ Ջուլհակյանի մասին ասել էր.«դա մաշեննիկ է, որեւէ սեփականություն չունի: Իրեն ձեւացնում է լուրջ բիզնեսմեն, այնինչ, ոչ մի բաժնետոմս չունի, ընդամենը ֆիրմայի առեւտրային ներկայացուցիչ է Սուրգուտ քաղաքում եւ զբաղվում է լյուստրաների վաճառքով»:
24.04-ին ըստ հայցվորի, Հմայակ Հովհաննիսյանը լրատվամիջոցներից մեկում («Տարածք» վերնագրով հրապարակմամբ) ըստ հայցվորի տարածել է զրպարտչական հետեւյալ տեղեկությունը. «ՀայՀիդրոնախագիծ» ինստիտուտի տարածքն օտարվել է մի կասկածելի անձնավորության, «մաշեննիկի», որը պատրաստվում է իր ձեռքից խլել միության տարածքը»:
Tert.am-ում էլ Հմայակ Հովհաննիսյանը ասել էր. «Նա անհաջող ավանտյուրիստ է, ով վտանգ է ներկայացնում», «չակերտավոր բարերար», «միտումնավոր իրենց գլխին ջուր բաց թողնելով՝ դիմել է մինչեւ անգամ իր մեքենայի հետ կապված կողոպուտին»:
Lurer.com-ում արձանագրվել էր Հմայակ Հովհաննիսյանի հետեւյալ արտահայտությունը.«Առանց Սուրիկ Խաչատրյանի նա ոչինչ է»:
Հայցվորը վիրավորանքի եւ զրպարտության համար պահանջել էր առանձին-առանձին՝ 1-ական միլիոն դրամ:
Ի դեպ, հայցից դուրս ոստիկանության Կենտրոնականի բաժնում շարունակվում է Հմայակ Հովհանսիսյանի դեմ հարուցված քրեական գործի նախաքննությունը:
Մեր տեղեկություններով, եթե ընդհանուր իրավասության դատարանում Հմայակ Հովհաննիսյանը պարտվի, ապա անվճարունակ լինելու պատճառով նա ստիպված կլինի քրեական գործով ներգրավվել հանրային պաշտպան:
Ռուզան ՄԻՆԱՍՅԱՆ
