Վատ ավանդույթ է դարձել, որ Արտակ Նազարյանի մահվան գործով դատավարության երեքշաբթի օրվա նիստերը սկսվում են ուշացումով: Դրա պատճառն այն է, որ նախատեսված ժամին` ժամը 11-ին, ամբաստանյալները ոստիկանության կողմից Երեւանից Իջեւան տեղափոխված չեն լինում: Նախորդ նիստերից մեկում դատավոր Սամվել Մարդանյանը հայտարարեց, որ ինքն այդ կապակցությամբ զրույց է ունեցել ոստիկանության Տավուշի մարզային վարչության պետի հետ, որ վերջինս իր վերահսկողության ներքո է վերցնելու հարցը: Դատավարության հոկտեմբերի 23-ի նիստը նույն պատճառով սկսվեց կես ժամ ուշացումով: Այնուհետեւ դատավոր Մարդանյանը ներկայացրեց ոստիկանության կողմից դատարան ուղարկված գրությունները, որ Հակոբ Մանուկյանի պաշտպան Հրանտ Գեւորգյանի միջնորդությամբ դատակոչված վկաները բացակայում են Հայաստանի Հանրապետությունից: Ըստ այդ գրությունների`որպես վկա դատակոչված Հայկ Ասատրյանը չի կարող դատարան ներկայանալ, քանի որ գտնվում է Ռուսաստանում, իսկ Համլետ Աղամիրյանը` ԼՂՀ-ում:
Այնուհետեւ դատարանն անցավ ամբաստանյալների, վկա զինծառայողների վերաբերյալ կարգապահական խախտումների գրանցամատյանը, ծառայողական քննության նյութերը, եթե նման քննություն անցկացվել է, զորամասի հրամանատարի կողմից կազմված եւ ռազմական ոստիկանություն ներկայացված մեկուսացման գրությունները հետազոտելուն: Քանի որ դրանք ստացվել էին «գաղտնի գրություն» նշումներով, դատարանը որոշեց դրանք հետազոտել դռնփակ:
«Ուրեմն դրանք փակ աչքերով հետազոտեք»,- ասաց Արտակ Նազարյանի մայրը` Հասմիկ Հովհաննիսյանը:
Դռնփակ նիստի ընդմիջման ժամանակ դատարանում ներկայացված գաղտնի փաստաթղթերի վերաբերյալ տուժողի իրավահաջորդի ներկայացուցիչ, իրավապաշտպան Ռուբեն Մարտիրոսյանն ասաց. «Ակնհայտ կեղծած փաստաթղթեր են, որոնց նպատակն է կեղծել նախաքննական մարմնի հանցագործությունները»: Տուժողի իրավահաջորդի ներկայացուցիչ, պաշտպան Մուշեղ Շուշանյանն էլ հավելեց. «Պետական մեքենան լծված է կեղծ փաստաթղթեր սարքելու գործին, հանցանքը կոծկելու համար կատարում են նոր հանցանք»:
Կարդացեք նաև
Ոսկան ՍԱՐԳՍՅԱՆ
