Կենտրոն եւ Նորք-Մարաշ վարչական շրջանների ընդհանուր իրավասության դատարանում (դատավոր Արշակ Վարդանյանի նախագահությամբ) մեղադրական ճառով այսօր հանդես եկավ Կենտրոն համայնքի դատախազի տեղակալ Արմեն Աֆանդյանը:
Անցյալ տարվա օգոստոսի 2-ին գործարար Խաչիկ Գալոյանի սպանության գործով մեղադրվող 57-ամյա Բորիս Հակոբյանի համար նա միջնորդեց 12 տարվա ազատազրկում, իսկ ապօրինի զենք-զինամթերք պահելու մեղադրանքը պաշտպանելով, նա մյուս ամբաստանյալի՝ Վահրամ Մարգարյանի (Գուրգեն Մարգարյանի եղբոր) համար միջնորդեց 1 տարի 3 ամիս ազատազրկում:
Դատախազը անդրադարձավ պաշտպանական կողմի երեք փաստարկներին, այն է՝ խուզարկություն չի եղել, խուզարկության ընթացակարգին, խուզարկության լրիվությանը եւ հայտնաբերվածի փաթեթավորմանը: Նա ասաց, որ ապացույցները, մասնավորապես՝ խուզարկությամբ ձեռք բերված զենք-զինամթերքի (Վահրամ Մարգարյանի հորաքրոջ տնից) կասկածի տակ չեն կարող դնել խուզարկության օբյեկտիվությունը:
Նա նաեւ նշեց, որ ծանրացնող հանգամանքներ այդ գործով չեն հայտնաբերվել, որ սպանությունից հետո Բորիս Հակոբյանը կամավոր է ներկայացել ոստիկանության բաժին, նպաստել հանցագործության բացահայտմանը: Պաշտպանական կողմից ՀՀ փաստաբանների պալատի անդամ Կրոմվել Գրիգորյանը հակադարձեց մեղադրողին իր պաշտպանական ճառով: Նա ասաց, որ Վահրամ Մարգարյանին առաջադրված մեղադրանքի հիմքը չկա, ապացույցները չեն հիմնավորվել եւ որ մեղադրանքը հիմնված է բացառապես մեղադրողի ենթադրությունների վրա: Նա միջնորդեց, որ Վահրամ Մարգարյանին դատարանն արդարացնի, իսկ Բորիս Հակոբյանին առաջադրված ՀՀ քրեական օրենսգրքի 104 հոդվածի 1-ին մասը (սպանություն) ճիշտ չի որակված:
Կարդացեք նաև
Թե Բորիս Հակոբյանը, թե Վահրամ Մարգարյանը չընդունեցին իրենց առաջադրված մեղադրանքը, իսկ Վահրամ Մարգարյանը վերջին խոսքում ասաց, որ ոչինչ չի ուզում, միայն արդար լինի ամեն ինչ:
Դատարանը հեռացել է խորհրդակցական սենյակ՝ դատական ակտ կայացնելու:
Ռուզան ՄԻՆԱՍՅԱՆ
