«Զվարթնոցի» եւ «Արմավիա» ավիաընկերության բանակցությունների արդյունքում քիչ առաջ օդանավակայնի կողմից թույլատրվել է ավիաընկերության Երեւան–Մոսկվա 512 չվերթի սպասարկումը:
Նշենք, որ այսօր առավոտվանից մի խումբ ուղեւորներ անհույս սպասում էին իրենց թռիչքին, սակայն օդանավակայանը չէր սպասարկում «Արմավիա»-ին` նրա կուտակած 3 միլիոն 300 հազար դոլար պարտքի պատճառով: Օդանավակայանի պատասխանատուները պնդում էին, որ ավիաընկերությունն այս էլ որերորդ անգամ խախտում է քաղավիացիայի, «Արմենիա միջազգային օդանավակայանների» եւ «Արմավիա»-ի միջեւ կնքած համաձայնագիրը, որի համաձայն՝ սահմանված ժամանակացույցով ընկերությունն իր պարտքից պետք է վճարեր ֆիքսված գումար: «Արմենիա միջազգային օդանավակայաններ» ընկերության մամուլի քարտուղար Գեւորգ Աբրահամյանը Aravot.am-ին հայտնեց, որ արգելքը հանվել է եւ որ ուղեւորները սպասում են թռիչքի: Օդանավակայանը ընդառաջել է, քանի որ «Արմավիան» պարտքից եւս 150 հազար դոլար վճարել է, պարտք մնալով խոստացված վճարումից մոտ 800 հազար դոլար:
Նկատենք, որ վերջին մեկուկես շաբաթվա ընթացքում արդեն 4-5 անգամ ազգային ավիափոխադրող` «Արմավիա» ավիաընկերության չվերթները հետաձգվում, այնուհետեւ իրականացվում են` ուղեւորներին պատճառելով մի շարք անհարմարություններ:
Լուսինե ԲՈՒԴԱՂՅԱՆ
