Հատված ԱԺ ՀՀԿ խմբակցության անդամ Արտակ Դավթյանի հարցազրույցից:
– Դուք սոցիոլոգիական հարցումներին հավատո՞ւմ եք։
Կարդացեք նաև
– Նայած ինչ բնույթի են, եթե քաղաքական ենթատեքստ չեն պարունակում, հավատում եմ։
– Խոսքը քաղաքական հարցումների մասին է։ Վերջերս Ահարոն Ադիբեկյանի հարցումները մշտապես նույն «բովանդակությունն» ունեն։ Օրերս հերթական հարցումներից պարզվեց, որ հասարակության 90 տոկոսը համակրում է Գագիկ Ծառուկյանին, իսկ Դուք ասում եք՝ Սերժ Սարգսյանը մրցակցությունից դուրս է։
– Առաջին անգամ չէ, որ Ահարոն Ադիբեկյանի սոցհարցումներն առնվազն տարակուսանք են առաջացնում ու վիճարկելի են։ Նախ պիտի հասկանալ՝ ինչ տրամաբանությամբ է անցկացվել։ Եթե դա արվել է ԲՀԿ-ի համակիրների շրջանում, ապա դա այն է, ինչ ասում եք։ Ոչ մեկը չի հերքում, որ բազմաթիվ խնդիրներ ունենք, և երկրի գլուխը մշտապես քննադատության թիրախում է։ Բնական է, որ գործիչը, որը չի նույնացվում պետության առջև ծառացած խնդիրների հետ, այլ բարեգործությամբ է զբաղվում, առավելություն ունի, որովհետև խնդիրներից դուրս է ներկայացվում։ Բավական է քաղաքական ռեալ դաշտ տեղափոխել այդ մարդուն, և նա կունենա այդ համակրանքի բազմապատիկ կորուստ։
Ի վերջո, պիտի հասկանալ, որ երբ քննադատությունների սլաքն ուղղվում է կառավարությանը, մոռանում են մի շատ կարևոր բան. չէ՞ որ այդ իշխանությունները, տնտեսական քաղաքականություն վարողներն են նպաստել, որ այդ բարերարն իր բարեգործական գործունեությունն իրականացնի։ Այսինքն, ստանա շահույթ և դրանով բարեգործություն իրականացնի։ Ինչքան էլ քննադատում են կառավարությանը, հստակ է. նրանք թույլ են տվել, որ գումարներ վաստակեն և դրանք բարեգործական նպատակներով օգտագործեն։ Երբ այս ամենը քաղաքական դաշտ տեղափոխվի, և իրերն իրենց անուններով նշվեն, այդ դրական ֆոնին կփոխարինի իրական ֆոնը։
Ռուզան ԽԱՉԱՏՐՅԱՆ
«Իրատես de facto»
