«Ժառանգություն» կուսակցության վարչության նախկին անդամ Կարինե Հակոբյանի համոզմամբ, «Ժառանգություն» կուսակցությունն այլեւս Ազգային ժողովում ներկայացված չէ: «Իրականում դաշինք չի եղել: Ի սկզբանե: Զարմանում եմ` ո՞նց դա պարզ չի եղել Րաֆֆի Հովհաննիսյանի համար: Րաֆֆի Հովհաննիսյանը դյուրահավատ գտնվեց, չկողմնորոշվեց ու սխալվեց: Մանդատը վայր դնելու Հովհաննիսյանի որոշումը նրա երկրորդ սխալն էր, ինչը կուսակցությանը դուրս հանեց Ազգային ժողովից: «Ժառանգությունն» Ազգային ժողովում այլեւս ներկայացված չէ»,- Aravot.am-ին ասաց տիկին Հակոբյանը՝ անդրադառնալով «Ազատ դեմոկրատների» նախագահ Խաչատուր Քոքոբելյանի հայտարարությանը, թե իրենք ֆորմալ առումով մնալու են «Ժառանգություն» խմբակցությունում, բայց ներկայացնելու են «Ազատ դեմոկրատներին»:
«Երբ նպատակը ի սկզբանե հստակ չէ հասարակության համար, չեմ ուզում ասել` ազնիվ չէ, ոչ մեկի համար այս ավարտը պետք է զարմանալի չլիներ: Կարող է` իրենք ավելի մեծ ծրագրեր են ունեցել, բայց եթե վերլուծում ենք նրանց քայլերը, դա էլ արդեն համոզիչ չէ: Որովհետեւ մեծ ծրագրեր ունենալու դեպքում նրանք չպետք է վախենային դաշինք կազմելուց, բայց նրանք անգամ այդ 7 տոկոսից վախեցան: Ուրեմն հենց սկզբից գիտեին, որ 5 տոկոս պետք է լինի, ու այդ մեծ ծրագրերի ու նպատակների հարցը դուրս է գալիս: Մնում է մի փոքր խնդիր՝ Ազգային ժողով մտնել, պատգամավոր դառնալ: «Ազատ դեմոկրատները» փոքր, սահմանափակ խնդիր է լուծել՝ «Ժառանգությանը» միանալով: Իրականում նրանք կարճաժամկետ ծրագիր իրականացրին, որ Ազգային ժողով մտնեն»,- շարունակեց «Ժառանգության» նախկին անդամը: Տիկին Հակոբյանը չի մեղադրում «Ազատ դեմոկրատներին», այլ զարմանում է, թե «Ժառանգությունն» ինչու այդպես վարվեց. «Րաֆֆի Հովհաննիսյանը սխալվեց: Ավելի ճիշտ կլիներ ընդհանրապես ընտրությունների չմասնակցել, քան մեծ նպատակներից հետո գնալ այդ 5 տոկոսի ՝ նման վիրավորական պայմանի»:
Արփինե ՍԻՄՈՆՅԱՆ
