Հոկտեմբերի 22-ին Տավուշի մարզի Բերդ քաղաքում սկսվեց Իջեւանի տարածաշրջանի Ազատամուտ համայնքի ղեկավար Ժորա Մարտիրոսյանի եւ նրա 3 որդիների դատավարությունը: Նրանց բոլորին մեղադրանք է առաջադրված ՀՀ քրեական օրենսգրքի 258 հոդվածով (խուլիգանություն):
Մարտիրոսյանները մեղադրվում են այն բանում, որ այս տարվա մարտի 25-ին Ազատամուտում քարերով, բահի կոթերով, անկոթ բահերով, կենցաղային կացնով եւ մետաղական խողովակների կտորներով ծեծի են ենթարկել 3 անձանց, նրանց պատճառել մարմնական վնասվածքներ, ապա քարերով ջարդել նրանց տների պատուհանները: Գյուղապետ Ժորա Մարտիրոսյանը 2006թ. դեկտեմբերի 28-ին դատապարտվել է նույն՝ խուլիգանության հոդվածով : Դատավարության առաջին նիստում Ազատամուտի գյուղապետն ու նրա 3 որդիները հայտարարել են, որ առաջադրված մեղադրանքում իրենց մեղավոր չեն ճանաչում: Դատարանում նրանց շահերը պաշտպանում է դիլիջանցի փաստաբան Անահիտ Եսայանը: Հոկտեմբերի 22-ի նիստում դատարանում ցուցմունքներ տվեցին քրեական գործով 3 տուժողները: Գյուղապետի եւ նրա 3 որդիների խափանման միջոց է ընտրված չհեռանալու մասին ստորագրությունը:
Շուրջ մեկ ամիս առաջ՝ սեպտեմբերի 23-ին ՀՀԿ անդամ, ՀՀԿ-ի կողմից թեկնածու առաջադրված Ժորա Մարտիրոսյանը վերընտրվել է Ազատամուտ համայնքի ղեկավարի պաշտոնում: Ի դեպ, համայնքապետի ընտրություններում Ժորա Մարտիրոսյանի մրցակիցն էր այս քրեական գործով տուժողներից մեկը` Արտեմ Սարիբեկյանը,ով նախկինում, շուրջ 12 տարի, զբաղեցրել է համայնքի ղեկավարի տեղակալի պաշտոնը:
Կարդացեք նաև
Ոսկան ՍԱՐԳՍՅԱՆ
