ԵԱՀԿ երեւանյան գրասենյակի ղեկավար, դեսպան Անդրեյ Սորոկինը այսօր լրագրողների հետ հանդիպման ժամանակ ասաց, որ Հայաստանում մայիսին տեղի ունեցած խորհրդարանական ընտրությունները նախորդ բոլոր ընտրությունների համեմատ ավելի ժողովրդավարական են անցել:
Aravot.am-ը պարոն Սորոկինից հետաքրքրվեց՝ հայ դիտորդների արձանագրած խախտումները՝ օքսիդացող կնիքներն ու ընտրակաշառքը, որքանո՞վ են ազդել ժողովրդավարական ընտրությունների արդյունքների վրա:
«Մտածել է պետք, հետաքրքիր հարց է, պետք է մտածել, որ կողմից դրան պատասխանելն ավելի հեշտ կլինի»,- պատասխանեց պարոն Սորոկինը:
Կարդացեք նաև
Մի քանի րոպե լռելուց հետո գործընկերոջը լրացրեց ԵԱՀԿ երեւանյան գրասենյակի ղեկավարի տեղակալ Ուիլիամ Հենլոնը. «Լուրջ առաջընթաց կա ժողովրդավարական փորձի ու անցկացման առումով: Ընտրական օրենսգիրք է մշակվել, ընդունվել, որը ապացուցել է, որ շատ արդյունավետ է: Եղել են, իհարկե, խնդիրներ: Մեր կարծիքով, ընտրությունները տեխնիկապես լավ են անցել: Թանաքի հետ կապված խնդիրները ընդունվեցին ու քննարկվեցին, ինչպես դրանք լուծել»:
Պարոն Սորոկինին խնդրեցինք հստակեցնել ընտրություններում ընտրակաշառք բաժանելու վերաբերյալ մեր հարցի պատասխանը. «Մենք նախ եւ առաջ համագործակցում ենք գլխավոր դատախազության հետ: Նրանց հայտարարության մեջ հստակ ասված էր, եթե ընտրողը հաղորդում է ներկայացնում կաշառք առաջարկելու մասին, հաղորդում ներկայացնողը պատասխանատվությունից ազատվում է, համապատասխանաբար քրեական գործ կհարուցվի: Ուզում եմ ասել, որ մենք աշխատում ենք այստեղ տարբեր կառույցների հետ»:
Մեր հարցին, թե առաջիկա նախագահական ընտրություններում ժողովրդավարական ընտրություններ անցկացնելու ամենամեծ խոչընդոտը ո՞րն է իր համար, պարոն Սորոկինը պատասխանեց. «Հայաստանի նախագահը, նախագահական ընտրություններին անդրադառնալով, հստակ նշեց, որ դրանք անցկացվելու են ԵԱՀԿ/ԺՀՄԻԳ-ի դիտողություններին համահունչ: Մենք ստացանք երաշխիքներ ամենաբարձր պաշտոնյայից»:
Արփինե ՍԻՄՈՆՅԱՆ
