Այսօր Կենտրոն եւ Նորք- Մարաշ վարչական շրջանների դատարանում, դատավոր Մխիթար Պապոյանի նախագահությամբ, շարունակվեց «բանդայի գործով» դատավարությունը։ Դատական նիստին ներկա էին բոլոր ամբաստանյալները՝ Արտուշ Հակոբյանը («Սուրիկի լավաշի» տիրոջ որդին), Դավիթ Գալստյանը, Արման Դալլաքյանը, Արթուր Մանուկյանն ու Քյարամ Ամոյանը, վերջինների պաշտպանները նույնպես: Նշենք, որ նախորդ նիստը հետաձգվել էր Քյարամ Ամոյանի պաշտպան Յուրա Ալոյանի բացակայության պատճառով:
Հավելենք, որ ամբաստանյալ Ամոյանն ու Դալլաքյանը, որը նիստին ներկայացել էր գլխարկով, դատարանին հայտնեցին իրենց առողջական խնդիրների մասին, ինչի հետ կապված դատավոր Մխիթար Պապոյանն առաջարկեց շտապօգնություն կանչել, սակայն վերջինները նշեցին, որ առայժմ դրա կարիքը չեն զգում:
Արտուշ Հակոբյանի պաշտպան Հովիկ Արսենյանը բացարկ հայտնեց դատախազ Ջոն Ֆարխոյանին՝ թվելով մի շարք մեղադրանքներ ու սխալներ: Բացարկին միացան պաշտպաններից եւս երեքը:
Կարդացեք նաև
Դատարանը հեռացավ խորհրդակցության սենյակ. որոշումը կհրապարակվի քիչ անց:
Հիշեցնենք, որ «բանդան» մեղադրվում է Ազգային ժողովի նախկին պատգամավոր Նապոլեոն Ազիզյանի, Մալաթիա-Սեբաստիա վարչական շրջանի նախկին ղեկավար Աղվան Գրիգորյանի եւ մի քանի այլ բարձրաստիճան պաշտոնյաների առանձնատների վրա ավազակային հարձակում կատարելու մեջ:
Դատախազի դեմ բացարկը մերժվեց: Արթուր Մանուկյանի պաշտպան Ռաֆիկ Սաֆարյանի բացակայության պատճառով նիստը հետաձգվեց: Հաջորդ նիստը կկայանա հոկտեմբերի 29-ին, ժամը 12-ին:
Եվա ՀԱԿՈԲՅԱՆ
